تەوقە گەرمەکەی سوودانی لەگەڵ ترەمپ ڕووبەڕووی ڕەخنە بووەتەوە

ئاڤا نیوز

هاوپەیمانیەتییەکەی سوودانی بۆ هەڵبژاردن، وەڵامی ڕەخنەی هەندێک لایەنی سیاسیی عێراقی دەداتەوە، گوایە تەوقە گەرمەکەی سوودانی لەگەڵ ترەمپ بەواتای ئاسایکردنەوەی پەیوەندیی لەگەڵ ئیسرائیل دێت، ئەوان دەڵێن: "ئەم واتایە ناگەیەنێت".

چیرۆکی سەرەکی: ڕۆژی دووشەممە، محەممەد شیاع سوودانی، سەرۆکوەزیرانی عێراق، بە نوێنەرایەتیی عێراق بەشداری لووتکەی ئاشتی شەرەم شێخی کرد. ترەمپ پێشوازیی لە سوودانی کرد و تەوقەیەکی گەرمیان کرد، ئەمەش ڕەخنە و کاردانەوەی لەلایەن لایەنەکانی سەر بە ئێران لە عێراق بەدوای خۆیدا هێناوە.

لێدوانی فەرمی: محەممەد تائی، سەرکردەیە لە "هاوپەیمانییەتیی ئاوەدانکردنەوە و گەشەپێدان" لە چاوپێکەوتنێکی تەلەڤزیۆنی دەڵێت: لە ساڵی 2006ـەوە هەموو سەرۆکوەزیرانەکانی عێراق تەوقەیان لەگەڵ سەرۆکەکانی ئەمریکا کردووە و هەموویان چوونەتە واشنتن و لەوەش زیاتر پێشوازییان لێکرا.

محەممەد تائی دەشڵێت: لووتکەی شەرەم شێخ لووتکەی ئاساییکردنەوەی پەیوەندیی لەگەڵ ئیسرائیل نییە، ئەم لووتکەیە لەلایەن کۆمەڵگەی نێودەوڵەتییەوە پاڵپشتی دەکرێت بۆ کۆتاییهێنان بەو کارەساتەی بەسەر غەززە هات. نەتەوەیەکگرتووەکان بەشداری لووتکەکە بوو، ئیسرائیل ئەندامە لە نەتەوەیەکگرتووەکان، سەرۆکوەزیرانەکانی عێراق لە دانیشتنەکانی نەتەوەیەکگرتووەکان وتار پێشکەش دەکەن، ئەمەش خۆ بە مانای ئاسایکردنەوەی پەیوەندی لەگەڵ ئیسرائیل نایەت.!

ئەو سەرکردەیەی هاوپەیمانی ئاوەدانکردنەوە و گەشەپێدان ئەمەشی وت، تەوقەکەی سوودانی لەگەڵ ترەمپ کاریگەریی لەسەر جەماوەرییەکەی نابێت لە هەڵبژاردندا و ئەوەی سەرۆکوەزیران کردوویەتی لەلایەن کەسانی دیکەوە ئەنجامدراوە، دەکرا تەوقەکردنەکە لە بەغدا یان واشنتن ڕووی دابا.