ئەو ڕێککەوتنەی سەرۆکی چوار وڵات لەبارەی غەززە واژۆیان لەسەر کرد چی لێ نووسراوە؟

ئاڤا نیوز

بەپێی ناوەرۆکی ئەو ڕێککەوتنەی دوێنێ لە شەرەم شێخ لەلایەن سەرۆکی هەریەکە لە ئەمەریکا، میسر، قەتەر و تورکیا، بەڵێن دەدەن بە هەموو جۆرێک کار بکەن بۆ هێنانەدی ئاشتییەکی هەمیشەیی لە کەرتی غەززە لەسەر بنەمای پاراستنی شکۆ و ڕێز لە هەموو کەسێک بەبێ هیچ جۆرە جیاکارییەک.

وێنە گەورەکە: لە میانی لووتکەی ئاشتی بۆ غەززە کە دوێنێ 13-10-2025  بە بەشداری 20 وڵات لە شاری شەرەم شێخ لە میسر ئەنجام درا، هەریەک لە ئەمەریکا، میسر، قەتەر و تورکیا وەک وڵاتانی دڵنیاییدەری ڕاگەیاندنی ئاگربەست لە نێوان ئیسرائیل و حەماس واژوویان لەسەر 'ڕاگەیاندراوی نیازپاکی' کرد.

پێویستە ئەمە بزانیت: لە میانی لووتکەکەدا وڵاتانی دڵناییدەر واژوویان لەسەر ڕێککەوتنێک کرد و بەڵێنیان دا بۆ ئەوەی ئاگربەستەکە یەکجارەکی بێت و پرۆسەی ئاوەدانکردنەوەی کەرتەکە لەژێر چاودێری نێودەوڵەتیدا بێت.

ناوەڕۆکی ڕاگەیێنراوەکە بەم جۆرەیە:

بەڵێن دەدەین ناوچەکە بکەین بە شوێنێک بەبێ جیاوازی ڕەگەز، باوەڕ، ڕەنگ و بنەچەی نەتەوەیی، تیایدا شکۆی هەموو کەسێک پارێزراو و ڕێزلێگیراو بێت و دەرفەتی یەکسانی بۆ بڕەخسێنرێت.

ئێمە بەدوای دیدگایەکی گشتگیردا دەگەڕێین بۆ هێنانەدی ئاشتی، ئارامی و خۆشگوزەرانیی هاوبەش لەسەر بنەمای ڕێزی دوولایەنە و چارەنووسی هاوبەش. 

بەم ڕۆ‌حیەتە بە خۆشحاڵییەوە پێشوازی دەکەین لە هێنانەدی ئاشتییەکی هەمیشەیی و بەرفراوان لە کەرتی غەززە و دروستکردنی پەیوەندییەکان لەسەر بنەمای بەرژەوەندیی هاوبەش و دۆستانە لە نێوان ئیسرائیل و وڵاتانی ناوچەکە.

بۆ کارکردن و پاراستنی ئەم میراتە، بەڵێن دەدەین هەموومان پێکەوە تێبکۆشین و بناغەیەک دابنێین ببێتە هۆی پێکەوەژیانی ئاشتییانەی نەوەکانی داهاتوو. خۆمان تەرخان دەکەین بۆ بەدیهێنانی داهاتوویەک کە ئاشتی هەمیشەیی باڵی بەسەردا بکێشێت.