بایۆمەتری سلێمانی: ئەمساڵ هەر خوێندکارێک بچێتە زانکۆ پێویستە UPNـی هەبێ

ئاڤا نیوز

بەڕێوەبەری بایۆمەتری سلێمانی دەڵێت، ئەمساڵ هەموو خوێندکارێک کە لە زانکۆ و پەیمانگەکان وەردەگیرێن پێویستە UPNـیان هەبێ، ئەمەش لەو چوارچێوەی پرۆسەی بەدیجیتاڵیکردنی کارەکانی حکومەتی هەرێمی کوردستانە.

وێنە گەورەکە: ژمارەی کەسیی بێ هاوتا (UPN) ناسێنەرێکی تایبەتی (13) ژمارەییە، هەموو کەسێکی دانیشتووی هەرێمی کوردستان پێویستە هەیبێت، ئەم ناسنامەیە دەروازەیەکە بۆدەستڕاگەیشتن بە هەموو خزمەتگوزارییە دجیتاڵییەکانی حکومەتی هەرێمی کوردستان.

لێدوانی فەرمی: یادگار جەبار، بەڕێوەبەری بایۆمەتری سلێمانی بە ئاڤا میدیای وت، بۆ ئەمساڵ مەرجە لە سەرتاسەری هەرێمی کوردستان هەموو خوێندکارێک کە دەچێتە قۆناغی یەکەمی زانکۆ سەردانی بنکەکانی بایۆمەتری لە بانکەکان بکات و خۆی تۆمار بکات.

یادگار جەبار دەشڵێت: ساڵی پاریش داوامان لە وەزارەتی خوێندنی باڵا و توێژینەوەی زانستی کرد پێویستە هەموو خوێندکارێک (یو پی ئێن)ـی هەبێ، بەشی هەرە زۆری خوێندکاران (یو پی ئێن)ـیان دروست کرد. بەڵام هەموویان نەبوون و ئەمساڵ داوا دەکەین هەموو خوێندکاران خۆیان تۆمار بکەن.

ئەوەی پێویستە بیزانیت: بە گوێرەی وتەی بەڕێوەبەری بایۆمەتری سلێمانی، ڕۆژانە لە سنووری پارێزگای سلێمانی نزیکەی 300 کەس UPNـیان بۆ دروست دەکرێت و لەم ماوەیە زیاتر لە 40 هەزار کەس تۆمار کراون. هەموو ئەوانەی تۆماری بازرگانیان هەیە ئەگەر بیانیش بن، هەموو ئەوانەی دەبن بە پارێزەر، ئەو فەرمانبەرانەی لە مۆڵەتن و دەستبەکاردەبنەوە هەموو ئەوانە UPNـیان بۆ دروست دەکرێت.