12 ڕۆژی دیکە دەوامی قۆناغی یەکەمی زانکۆ و پەیمانگەکان دەستپێدەکات

ئاڤا نیوز

وەزارەتی خوێندنی باڵا و توێژینەوەی زانستی ئەنجامی زانکۆلاینی ڕاگەیاند، قوتابیانی وەرگیراو ماوەی 12 ڕۆژیان لەبەردەمە بۆ ئەوەی مامەڵەکانیان تەواو بکەن و دەست بە دەوام بکەن، لەماوەی پێنج ساڵی ڕابردوو سەرجەم دەرچووان لە زانکۆ و پەیمانگەکان وەرگیراون.

چیرۆکی سەرەکی: وەزارەتی خوێندنی باڵا 65 هەزار 476 کورسی خوێندنی لە زانکۆ و پەیمانگەکان بۆ دەرچووانی ئەمساڵ و ساڵی ڕابردوو تەرخانکردبوو، 97٪ـی دەرچووانی ئەمساڵ لە زانکۆ و پەیمانگەکان وەرگیراون، ئەو 3٪یە بەهۆی ئەوەی بژاردەکانیان لە نمرەکانیان بەرزتر بووە، بۆیە ناویان نەهاتووەتەوە.

لێدوانی فەرمی: د. خەتاب ئەحمەد، سەرۆکی لیژنەی باڵای وەرگرتن لە وەزارەتی خوێندنی باڵا، لە کۆنگرەیەکی ڕۆژنامەوانیدا گوتی، "45 هەزار و 717 دەرچووی ئەمساڵ و هەشت هەزار و 561 دەرچووانی ساڵانی ڕابردوو کە کۆی گشتی 54 هەزار و 278 پێشکەشکار دەکات لە زانکۆ و پەیمانگە حکومییەکان وەرگیراون.

سەرۆکی لیژنەی باڵای وەرگرتن لە وەزارەتی خوێندنی باڵا، ئەمانەشی گوت:

ـــ هەزار و 387 قوتابی بەهۆی کەمی نمرەکەیان وەرنەگیراون، 14 هەزار  و 731 کورسی بە بەتاڵی ماوەتەوە بەسەر ئەو قوتابیانە دابەش دەکرێن کە وەرنەگیراون.

ـــ هەزار و 368 قوتابی ناوچە کوردستانییەکانی دەرەوەی ئیدارەی هەرێم وەردەگیرێن و لە دوو ڕۆژی داهاتوو فۆڕمەکە کارا دەکرێت.

ــ 26-10-2025 دەوامی فەرمی قوتابیانی قۆناغی یەکەم لە زانکۆ و پەیمانگەکان دەست پێدەکات و دەبێت پێش ئەو وادەیە قوتابیان مامەڵەی وەرگرتنیان تەواو بکەن.

ژمارەکان وادەڵێن: لەماوەی کابینەی نۆیەم، سەرجەم قوتابیان وەرگیراون، ساڵانە ڕێژەی وەرگرتنی قوتابیان لە زانکۆ و پەیمانگەکان بەمشێوەیە بووە:

ساڵی 2019 – 2020: 41 هەزار و 833 قوتابی
ساڵی 2020 – 2021: 49 هەزار و 496 قوتابی
ساڵی 2021-2022: 47 هەزار و 746 قوتابی
ساڵی 2022-2023: 41 هەزار و 253 قوتابی
ساڵی 2023 – 2024: 53 هەزار و 79 قوتابی
ساڵی 2024 – 2025: 51 هەزار و 579 قوتابی