ئەنفلۆنزای باڵندە لە عێراق بڵاو دەبێتەوە و هەزاران پەلەوەر لەنێو دەبات

ئاڤا نیوز

جۆرێکی زۆر ترسناکی پەتای ئەنفلۆنزای باڵندە لەنێو کێڵگە پەلەوەرییەکانی عێراق بڵاو دەبێتەوە، بەهۆیەوە زیاتر لە 12 هەزار پەلەوەر مردار دەبنەوە.

 

ئەوەی پێویستە بیزانیت: ڕۆژی سێشەممە 2025-10-14، وەزارەتی کشتوکاڵی عێراق بڕیاری قەدەغەکردنی هاوردەکردنی پەلەوەری زیندوو و بەستوو و بەرهەمەکانیان و هەموو جۆرە باڵندەیەکی لە 39 وڵاتەوە دەرکرد.

 

بڵاوکراوەی فەرمی: بەپێی زانیارییەکانی ئاژانسی "ڕۆیتەرز"، ڕێکخراوی جیهانی تەندروستیی ئاژەڵان کە بارەگاکەی لە پاریسە، بە پشتبەستن بە ڕاپۆرتێکی دەسەڵاتدارانی عێراق، ڕایگەیاند، کە جۆرێکی زۆر ترسناکی ڤایرۆسی H5N1ی ئەنفلۆنزای باڵندە لەناو پەلەوەرەکانی شارۆچکەی بەعشیقە دۆزراوەتەوە و بەهۆیەوە 12 هەزار پەلەوەر مردار بوونەتەوە.

 

لەلایەکی دیکەوە: هەر بەگوێرەی ئاژانسەکە، ئێران-یش لەم مانگەدا سەرهەڵدانی هەمان جۆری پەتاکەی ڕاگەیاندبوو.

 

ئەوەی لەوبارەیەوە دەگوترێت: وەزارەتی کشتوکاڵی عێراق ئاماژەی بەوە داوە کە بڕیاری قەدەغەکردنەکە تەکنیکییه و پەیوەندی بە کەمی یان زۆری بەرهەمی ناوخۆییەوە نییە. ئاماژەی بەوەشدا کە قەدەغەکردنەکە لەسەر هەر وڵاتێک لادەبرێت، کاتێک لەلایەن ڕێکخراوی جیهانی تەندروستیی ئاژەڵانەوە بەفەرمی ڕادەگەیێنرێت کە وڵاتەکە پاکبووەتەوە لە نەخۆشییەکە.