ئاڤا وادەی کردنەوەی شەقامی 100 مەتریی سلێمانی بەڕووی شۆفێران ئاشکرا دەکات

ئاڤا نیوز

 

گوتەبێژی شارەوانیی سلێمانی دەڵێت، پڕۆژەی شەقامی 100 مەتری سلێمانی لە قۆناغی کۆتایی دایە و تاوەکو ئێستا 80%ی کارەکانی تەواو بووە، بڕیاریشە ساڵی داهاتوو بەڕووی شوفێراندا بکرێتەوە.

 

وێنە گەورەکە: شەقامی 100 مەتری سلێمانی یەکێک لە پڕۆژە ستراتیژی و گرنگەکانی کابینەی نۆیەمی حکومەتی هەرێمی کوردستان، بە سێ قۆناغ دەست بە کارەکانی کراوە، ئامانج لێی ئاسانکاریی هاتووچۆ بۆ شوفێران و کەم کردنەوەی قەرەباڵغی شەقامکانی ناوشاری سلێمانییە.

 

لێدوانی فەرمی: زەردەشت ڕەفیق، گوتەبێژی شارەوانیی سلێمانی بە ئاڤای ڕاگەیاند: کارکردن لە پڕۆژەی شەقامی 100 مەتری سلێمانی بەردەوامە، تاوەکو ئێستا 80%ی کارەکانی تەواو بووە بەشێکی کەم ماوە کە لە ناوچەی دەمرکانە، مانگی نۆی ساڵی 2026 بەڕووی شوفێران دەکرێتەوە."

 

ئەمەش بزانە: درێژی شەقامی 100 مەتری سلێمانی 32 کیلۆمەترە، تێچووی شەقامەکە 400 ملیار دینارە و لەسەر بودجەی حکومەتی هەرێمی کوردستان جێبەجێ دەکرێت.