چوار پارچە زەوی داچێنراو بە سەوزە لە هەولێر تێکدران

ئاڤا نیوز

بەڕێوەبەرایەتی گشتیی کشتوکاڵی هەولێر، چوار پارچە زەوی داچێنراو بە سەوزەیان تێکدا، کە لەسەر زەوییەکانی شارەوانی کرابوون و بە ئاوی قورس ئاو دەدران.

 

وێنە گەورەکە: لەسەر ڕێڕەوی ئاوەڕۆی هەولێر چەندین کێڵگەی بەرهەمهێنانی سەوزە هەن و بەو ئاوەڕۆیە ئاو دەدرێن کە پاشماوەی ئاوی قورسی ماڵانە، بەشی زۆریان دەکەونە ڕۆژئاوای شاری هەولێر، بەدیاریکراوی ڕێگای نێوان مووسڵ و کەرکووک جگە لە هەولێر لە چەند شار و شارۆچكەیەكی دیكەی هەرێمی كوردستانیش هەمان حاڵەت هەیە بەڵام بە ڕێژە و ژمارەی كەمتر.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "تیمەکانمان بەردەوام دەبن لە تێکدانی ئەو زەوییانەیە، هەر کەسێکیش لەسەر ئەم کارە بگیرێت ڕادەستی یاسا دەکرێت، تاوەکو ئێستا 19 کەس لەسەر ئاودانی سەوزە بە ئاوی قورس دەستگیر کراون."

 

باکگراوند: لەماوەی ڕابردوو سەرۆکوەزیران مەسرور بارزانی چوار بڕیاری تایبەت بە پاكڕاگرتنی ژینگەی دا و یەكێك لە بڕیارەكان بریتییە لە ڕێگری لە بەکارهێنانی ئاوی پیس و ئاوەڕۆکان بۆ ئاودانی سەوزە و ئاودێری.