قۆناغی سێیەمی دابەشکردنی زەوی دەستپێدەکات؛ نزیکەی 15 هەزار زەوی لە سنووری هەولێر ئامادەن

ئاڤا نیوز

سەرۆکایەتیی شارەوانی هەولێر نەخشەسازی قۆناغی سێیەمی زەوییەکانی تەواوکردووە، بڕیارە لە ماوەی داهاتوو نزیکەی 15 هەزار پارچە زەوی بەسەر فەرمانبەران و خانەنشینان دابەشبکرێت.

وێنە گەورەکە: لە سنووری پارێزگای هەولێر نزیکەی 70 هەزار فەرمانبەر و خانەنشین لە پرۆسەی وەرگرتنی زەوی سوودمەند دەبن، کە نزیکەی 35 هەزاریان لە سنووری سەرۆکایەتی شارەوانی هەولێرن. تا ئێستا 60 هەزار فەرمانبەر و خانەنشین ناویان لە ئەنجوومەنی وەزیرانەوە بۆ پێدانی زەوی گەڕاوەتەوە.

لێدوانی فەرمی: کارزان عەبدولهادی، سەرۆکی شارەوانی هەولێر ڕایگەیاند، لەچەند ڕۆژی داهاتوو تیروپشک بۆ دابەشکردنی زەوییەکان دەکەین، بەشێکی ئەو زەوییانە بۆ قەرەبووی جووتیارانە."

باکگراوند: ڕۆژی 27-03-2024، لە کۆبوونەوەی ئەنجوومەنی وەزیران، مەسرور بارزانی، سەرۆکوەزیرانی کوردستان چەند بڕیارێکی لە بەرژەوەندی خەڵک و فەرمانبەران دا، یەکێک لە بڕیارەکان دابەشکردنی زەوی بوو بەسەر فەرمانبەران. بەو هۆیەوە لەماوەی کەمتر لە ساڵێکدا هەزاران پارچە زەوی بەسەر فەرمانبەران دابەشکران.