چەند كەسێك هەڵدەكوتنە سەر نووسینگەی كاندیدێكی پارتی لە شنگال و پۆستەرەكانی دەسووتێنن

ئاڤا نیوز

لە شنگال چەند كەسێكی نەناسراو هەڵدەكوتنە سەر نووسینگەی كاندیدێكی پارتی دیموكراتی كوردستان و ژمارەیەكی زۆر پۆستەری بانگەشەی دەسووتێنن.

چیرۆکی سەرەکی: کاندیدانی پارتی لە شار و شارۆچکەکانی کوردستان بەمەبەستی ئامادەکاری بۆ هەڵبژاردن و بەدەستهێنانی دەنگی هاووڵاتیان، خەریکی بانگەشەی هەڵبژاردنن، لە شنگال چەند کەسێکی نەناسراو هەڵدەکوتنە سەر نووسینگەی کاندیدێکی ئەو حیزبە و پۆستەرەکانی دەسووتێنن.

لێدوانی فەرمی: مەحما خەلیل، كاندیدی ژمارە 5ـی پارتی لە بازنەی نەینەوا بە ئاڤای ڕاگەیاند: چەند كەسێك كە هەڵگری بیر و ڕەوشتی ڕێكخراوی داعشن لە كاتژمێر 12ـی بەرەبەیانی ئەمڕۆ هەڵیانكوتاوەتە سەر نووسینگەكەم لە قەزای شنگال و پۆستەر و تابلۆكانی بانگەشەی هەڵبژاردنیان سووتاندووم.

زانیاریی زیاتر: ئەو كاندیدەی پارتی ئەو كردارە بە "ترسنۆكانە" وەسف دەكات و دەڵێ بە تووندی ئیدانەی دەكەین، ڕاشیگەیاند: ئەمە بەڵگەیە لەسەر ئەو گرووپە تیرۆریستییانە کە حەزیان بە خزمەت و میهرەبانی نییە.

باكگراوند: ڕۆژی نۆی ئۆکتۆبەری 2020، ڕێككەوتنی شنگال لە نێوان حكومەتی عێراق و حكومەتی هەرێمی كوردستان واژۆ کرا، بەڵام تاوەکو ئێستا حکومەتی عێراقی ڕێککەوتنەکە جێبەجێ ناکات و هەنگاوی جددی و ئامادەکاری پێویستی نەکردووە بۆ جێبەجێکردنی ئەو ڕێککەوتنە، کە ئامانج لێی ئاسایی کردنەوەی شنگال و ئاوەدانکردنەوەی سنوورەکەیە.