جووتیارێکی هەورامان داهێنانێکی جیاواز دەکات بۆ گواستنەوەی بەرهەمی باخەکەی

ئاڤا نیوز

 

لە گوندی زەڵم لە هەورامان، هەمزە عەفار، جووتیارێکی ماندوونەناس، ڕووبەڕووی کێشەیەکی گەورەی باخەکەی دەبێتەوە؛ کە گواستنەوەی بەرهەمی باخەکەیەتی، کە دەکەوێتە شوێنێکی بەرز و سەخت، بۆ سەر شەقامی گشتی. ئەمەش وایکردبوو کە ساڵانە ماندووبوون و ڕەنجی ئەم جووتیارە بەفیڕۆ بڕوات.

چیرۆکی سەرەکی؛ وەک خۆی باسی دەکات، پێشتر بە کۆڵ و پشتی خۆی بەرهەمەکانی دەگواستەوە، ئەمەش هەم کاتێکی زۆری دەویست و هەم وزەیەکی زۆر. بەڵام لە ساڵی 2011دا، هەمزە بە بەکارهێنانی ماتۆڕەکەی و چەند کەرەستەیەکی سادە، تەلەفریکێکی بچووکی دروستکرد. ئەم داهێنانە سادەیە، بەڵام کارامەیە، یارمەتی زۆری ئەو جووتیارەی دا بتوانێت بەرهەمەکانی بە ئاسانی بگوازێتەوە بازاڕەکان. تەلەفریکەکە بەرهەمەکانی، بەتایبەت هەنجیری بەناوبانگی باخەکەی، لەمبەر چەمی زەڵمەوە بۆ ئەوبەری دەگوازێتەوە و بە ئاسانی دەیگەیەنێتە سەر شەقامی سەرەکی تاوەکو بتوانێت بیبات و لە بازاڕەکان ساغی بکاتەوە.