یه‌که‌مین کڵێسای سریانه‌کان له‌ دهۆک کرایه‌وه

ئاڤا نیوز

یه‌که‌مین کڵێسای تایبه‌ت به‌ کریستیانه‌ سریانییه‌کان به‌ ناوی "مریه‌م العه‌زراء" له‌ ده‌ڤه‌ری بادینان کرایه‌وه‌. ئه‌م بۆنه‌یه‌ به‌ به‌شداریی که‌سایه‌تییه‌ گه‌وره‌ ئایینییه‌کانی سه‌ر ئاستی جیهان، ڕۆژهه‌ڵاتی ناوه‌ڕاست و کوردستان به‌ڕێوه‌چوو.

 

دوای ڕووداوه‌کانی ساڵی 2014 و هاتنی چه‌کدارانی داعش بۆ نه‌ینه‌وا، به‌شێکی زۆر له‌ کریستیانه‌ سریانییه‌کان ئاواره‌ بوون و ڕوویان له‌ پارێزگای دهۆک کرد. ئارامی و سه‌قامگیری هه‌رێمی کوردستان به‌گشتی، و کولتووری پێکه‌وه‌ژیانی به‌هێز له‌ دهۆک به‌تایبه‌تی، وایکردووه‌ که‌ ئه‌م شاره‌ ببێته‌ ناوه‌ندێک بۆ ژیانی ئاشتیانه‌ی پێکهاته‌ جیاوازه‌کان. کردنه‌وه‌ی ئه‌م کڵێسایه‌ش وه‌ک هه‌نگاوێکی گرنگ بۆ چه‌سپاندنی زیاتری ئه‌م پێکه‌وه‌ژیانه‌ داده‌نرێت.

 

کۆمه‌ڵگه‌ی سریانی له‌ دهۆک و ده‌وروبه‌ری به‌ گه‌رمی پێشوازییان له‌ کردنه‌وه‌ی کڵێساکه‌ کرد. شه‌ماشا سالم، که‌ سریانییه‌کی خه‌ڵکی زاخۆیه‌ و بۆ به‌شداری له‌ ڕێوڕه‌سمه‌که‌دا هاتبووه‌ دهۆک، بە ئاڤای وت: "زۆر دڵخۆشین به‌ کردنه‌وه‌ی ئه‌م کڵێسایه‌، که‌ ئه‌نجامی پشتیوانیی حکومه‌تی هه‌رێمی کوردستانه‌ بۆ سریانه‌کان."

هاوکات، دینا ئه‌رکان، که‌ ئافره‌تێکی تری سریانییه‌، ئاماژه‌ی به‌وه‌دا که‌ "حکومه‌تی هه‌رێمی کوردستان هیچ جیاوازییه‌ک له‌نێوان کریستیان، موسڵمان و ئێزدییه‌کاندا ناکات، هه‌ر بۆیه‌ ئه‌م کڵێسایه‌ له‌ دهۆک کرایه‌وه‌ و دڵی ئێمه‌ی زۆر خۆش کرد." سارا قه‌یس، کچێکی دیکه‌ی سریانییه‌ و ده‌ڵێت، "کردنه‌وه‌ی ئه‌م کڵێسایه‌ شتێکی چاوه‌ڕواننه‌کراو نه‌بوو، چونکه‌ ئێمه‌ هه‌میشه‌ چاوه‌ڕێی ئه‌م گرنگیدانه‌ له‌ حکومه‌تی هه‌رێمی کوردستان ده‌که‌ین و دڵخۆشین که‌ لێره‌ گرنگی به‌ سریانه‌کان ده‌درێت."

 

لێدوانی فەرمی؛ ئانۆ جه‌وهه‌ر، وه‌زیری گواستنه‌وه‌ و گه‌یاندنی حکومه‌تی هه‌رێمی کوردستان، که‌ وه‌ک نوێنه‌ری سه‌رۆکوه‌زیران مه‌سرور بارزانی به‌شداری له‌ ڕێوڕه‌سمه‌که‌دا کردبوو، ڕایگه‌یاند: "ڕێبازی حه‌کیمانه‌ی سه‌رۆک بارزانی و گرنگیدان به‌ هه‌موو پێکهاته‌کان به‌بێ جیاوازی، ئه‌نجامه‌که‌ی ئه‌وه‌یه‌ که‌ ئه‌مڕۆ سریانه‌کان له‌ دهۆک دڵخۆشن. کردنه‌وه‌ی ئه‌م کڵێسایه‌ هه‌نگاوێکی دیکه‌ی گرنگه‌ بۆ پته‌وکردنی بنه‌ماکانی پێکه‌وه‌ژیان له‌م ده‌ڤه‌ره‌دا."

 

به‌پێی ئاماره‌کان، زیاتر له‌ 500 خێزانی سریانی له‌ پارێزگای دهۆک نیشتەجێن. کردنه‌وه‌ی یه‌که‌مین کڵێسای تایبه‌ت به‌م پێکهاته‌یه‌، به‌ ئاماده‌بوونی په‌تریارک مار ئیگناتیۆس ئه‌فرامی دووه‌م، په‌تریارکی کڵێسای سریانی ئۆرسۆدۆکسی له‌ جیهان، جارێکی تر سه‌لماندی که‌ دهۆک ڕۆژ به‌ ڕۆژ زیاتر ده‌بێته‌ ناوه‌ندێکی جیهانی بۆ پێکه‌وه‌ژیانی ئایین و نه‌ته‌وه‌ جیاوازه‌کان.