یانەی نەورۆز دووچاری قەیرانێکی دارایی سەخت بووەتەوە

ئاڤا نیوز

یانەی نەورۆزی شاری سلێمانی دووچاری دۆخێکی دارایی سەخت بووەتەوە، بەردەوامبوونی یانەکەی لە خولی ئەستێرەکانی عێراق ڕووبەڕووی مەترسی گەورە کردووەتەوە.

وێنە گەورەکە: یانەی نەورۆز لە شاری سلێمانی، پێشتر لەلایەن لاهوور شێخ جەنگی، سەرۆکی یانەکە پاڵپشتی دارایی دەکرا، بەڵام لە دوای ئەوەی  لە 22-8-2025، لەلایەن دژەتیرۆر، کۆماندۆ و ئاسایشی یەکێتی هێرش کرایە سەر لالەزار و لاهوور شێخ جەنگی دەستگیر کرا، یانەکە دووچاری قەیرانی دارایی گەورە بووەتەوە.

لیدوانی فەرمی: هێرش هەورامی، جێگری سەرۆکی یانەی نەورۆز بە ئاڤا میدیای گوت: یانەکەمان دووچاری بارودۆخێکی دارایی سەخت بووەتەوە، ماوەی 40 ڕۆژە یاریزانەکان مووچەیان وەرنەگرتووە، هیچ ئاسۆیەکیش بۆ چارەسەری ئەو بارودۆخە دیار نییە.

ئەوەی پێویستە بیزانیت: بە گوتەی جێگری سەرۆکی یانەی نەورۆز، پێش هێرشەکەی سەر لالەزار سەرۆکی یانەکە بڕی دوو ملیۆن و 400 هەزار دۆلاری بۆ یانەکە تەرخان کردبوو، بەڵام پارەکە نەخرابووە سەر هەژماری بانکی و نازانرێت پارەکە چی بەسەرهات.

زانیاریی زیاتر: دەستەی کارگێڕی یانەی نەورۆز نووسراوی بۆ یەکێتی تۆپی پێی عێراقی و لایەنە پەیوەندیدارەکان لە عێراق و هەرێمی کوردستان کردووە، هاوکات نووسراو بۆ محەممەد شیاع سوودانی، سەرۆکوەزیرانی عێراقیش کراوە، بەڵام تا ئێستا هیچ وەڵامێکی ئەرێنی یانەکە نەدراوەتەوە.

بە تەنیشت ئەم بابەتەوە: بەهای گرێبەستەکانی ئەم وەرزەی یانەی نەورۆز چوار ملیار دینارە و تا ئێستا دیار نییە ئەو پارەیە چۆن دابین دەکرێت.

ئەمەش بزانە: بە گوتەی دەستەی کارگێڕی یانەکە تا ئێستا هیچ کۆمپانیا و سەرمایەدار و وەبەرهێنێکی شاری سلێمانی ئامادەیی دەرنەبڕیوە هاوکاری یانەی نەورۆز بکات.

هەنگاوی داهاتوو: بڕیارە هەفتەی داهاتوو دەستەی کارگێڕی یانەی نەورۆز کۆببێتەوە، هەڵوێستی یانەکە لەسەر ئەو بارودۆخە داراییە ڕابگەیەنێت.

کاریگەری و لێکەوتەکان: ئەم بارودۆخەی یانەکە کاریگەریی راستەوخۆی لەسەر ئەنجامەکانی دروست کردووە لە چوار یاری یەکەمی ئەمساڵی خولی ئەستێرەکانی عێراق، یانەی نەورۆز سێ یاری دۆڕاندووە و تەنیا یەک یاری بردووەتەوە، شەش گۆڵی کردووە، 11 گۆڵی لەسەر تۆمار کراوە و لە ڕیزبەندی 14ەهەم دێت.

مەترسییە پێشبینی کراوەکان: بەردەوامبوونی ئەو دۆخە داراییەی یانەی نەورۆز مەترسی ئەوەی لێدەکرێت یانەکە نەتوانێت بەردەوام بێت لە خولی ئەستێرەکانی عێراق و ڕەنگە تاکە نوێنەرەکەی پارێزگای سلێمانی لەو خولە بکشێتەوە.

چارەسەرەکان: هێرش هەورامی، جێگری سەرۆکی یانەی نەورۆز گوتی، داوا لە سەرۆکی حکومەتی هەرێمی کوردستان دەکەم هاوشێوەی یانەکانی هەولێر، دهۆک و زاخۆ یارمەتی یانەی نەورۆزیش بدات، چونکە وەک ئاشکرایە ئەو سێ یەنانەی هەرێمی کوردستان بە پاڵپشتی سەرۆکی حکومەت لە ڕووی ژێرخان و ئەنجامەوە لە ئاست و بارودۆخێکی زۆرباشدان، ئێمە هیوادارین پاڵپشتی بۆ ئەو یانانە بەردەوام بێت چونکە ئەوە جێگەی دەستخۆشیە، داوا دەکەین یارمەتی یانەی نەورۆزیش بدرێت.