بڕیاری خەرجکردنی مووچەی مانگی هەشت دەدرێت

ئاڤا نیوز

حکومەتی عێراق بەڵێنی داوە هەفتەی داهاتوو دوای دەستکردن بە دابەشکردنی مووچەی فەرمانبەرانی خۆی، مووچەی فەرمانبەرانی هەرێمی کوردستانیش بنێرێت، هاوکات وەزارەتی دارایی و ئابووریش نووسراوی ناردنی 120  داهاتی ناوخۆی تەواوکردووە.

وێنە گەورەکە: هەوڵەکان بۆ چارەسەرکردنی گرفتی نەناردنی مووچە لەلایەن بەغداوە بەردەوامن، حکومەتی هەرێمی کوردستان سەرجەم پابەندییە یاساییەکانی خۆی جێبەجێکردووە بەرامبەر بەغدا بەڵام تاوەکو ئێستا حکومەتی فیدراڵی وەکو پێویست پابەند نەبووە بە ڕێککەوتنەوە، هۆکارەکەشی بۆ نەبوونی سیولە لێکدەدرێتەوە.

 لێدوانی فەرمی: پێشەوا هەورامانی، گوتەبێژی حکومەتی کوردستان بە ئاڤای ڕاگەیاند: وەزارەتی دارایی و ئابووریی کوردستان نووسراوی ناردنی 120  ملیار دینار داهاتی نانەوتی بۆ بەغدا تەواو کردووە و بڕیارە ڕۆژی یەکشەممە 19ی مانگ بۆ بەغدا بنێردرێت، پارەکە بە کاش بە لقی هەولێری بانقی ناوەندی دەدرێت.

زانیاریی زیاتر: هەفتەی داهاتوو حکومەتی  عێراق دەست بە دابەشكردنی مووچەی مانگی 10ی فەرمانبەرانی خۆی دەکات، دوای دابەشکردنی مووچەی دوو بۆ سێ وەزارەت، ئینجا پارە بۆ هەرێمی کوردستان دەنێرێت ئەمەش بەپێی ئەو بەڵێنەی کە پێشتر داویەتی.

لەلایەکی دیکەوە: ڕێباز حەملان، یاریدەدەری سەرۆکوەزیرانی هەرێمی کوردستان، لەبارەی ناردنی داهاتی ناوخۆ بە ئاڤای ڕاگەیاند: كاتێک ئەنجوومەنی وەزیرانی عێراق نووسراوی فەرمی بۆ خەرجكردنی مووچەی هەر مانگێک بۆ وەزارەتی دارایی عێراق دەنێرێت، ڕاستەوخۆ كۆپییەک لەو نووسراوە بۆ وەزارەتی دارایی كوردستان دەنێردرێت، ئینجا هەرێمی كوردستان 120 ملیارەکە دەنێرێت.

لەبارەی وادەی خەرجکردنی مووچەش ڕێباز حەملان دەڵێت: چاوەڕوان بووین ئەمڕۆ ئەنجوومەنی وەزیرانی عێراق نووسراوی خەرجکردنی مووچەی مانگی هەشت دەربکات، بەڵام ئەمڕۆ نەگەیشت و کەوتە سەرەتای هەفتەی داهاتوو.