ئیسرائیل ڕێگە بە تیمی تورکیا نادات بچێتە غەززە

ئاڤا نیوز

ئیسرائیل بە پاساوی ڕادەستنەکردنەوەی تەرمی بارمتە ئیسرائیلییەکان لەلایەن حەماسەوە، ڕێگە بە تیمی تورکیا نادات بچێتە کەرتی غەززە.

لێدوانی فەرمی: میدیاکانی تورکیا بڵاویان کردووەتەوە بەرپرسێکی ئیسرائیلی بە میدیای وڵاتەکەی ڕاگەیاندووە بە هۆی ڕادەستنەکردنەوەی تەرمی بارمتە ئیسرائیلییەکان ئەم بڕیارەیان داوە.

بە تەنیشت ئەم بابەتەوە: میدیاکانی تورکیا ئەم پاساوە بەبێ واتا ناو دەبەن و باس لەوە دەکەن ئامانج لە ڕەوانەکردنی ئەم تیمە 81 کەسییەی تورکیا بە پێداویستییەکانیانەوە، گەڕان و دۆزینەوەی تەرمی بارمتە ئیسرائیلییەکانە لەژێر داروپەردووی داڕووخاوی باڵەخانەکاندا.

پێویستە ئەمەش بزانیت: سەرچاوەیەکی دیکە لەمبارەیەوە دەڵێت: تەرمی ژمارەیەک بارمتە هەن حەماس دەتوانێت یەکسەر ڕادەستیان بکاتەوە. شوێنی ئەو تەرمانە دەزانرێت، بەڵام دەرهێنانەوەیان پێویستی بە تیمی پسپۆڕ و پێداویستیی گرنگە.

لە لایەکی دیکەوە: گیدیۆن سار، وەزیری دەرەوەی ئیسرائیل ئاماژە بەوە دەدات وەک پابەندبوون بە ئاگربەستەکە حەماس دەتوانێت ژمارەیەکی زۆر لە بارمتەکان ئازاد بکات، بەڵام ئەوەی تاوەکوو ئێستا کردوویەتی، پێشێلکردنی ئاگربەستەکەیە.