لە بەغدا هێرش دەکرێتە سەر نووسینگەی کاندیدێک و بریندار هەیە

ئاڤا نیوز

 

هێرشێکی چەکداری لە ناوچەی یوسفیەی بەغدا دەکرێتە سەر نووسینگەی ئەندامێکی ئەنجوومەنی پارێزگای بەغدا و کاندید بۆ ئەم هەڵبژاردنەی خولی شەشەمی پەرلەمانی عێراق لە هاوپەیمانی عەزم و بەهۆیەوە براکەی بریندار دەکرێت.

 

ئەوەی پێویستە بیزانیت: ئەم هێرشە سەرلەبەیانیی ئەمڕۆ شەممە 18ی تشرینی یەکەمی 2025 کراوە و هاوکاتە لەگەڵ نزیکبوونەوەی وادەی هەڵبژاردنی پەرلەمان کە بڕیارە لە 11ی تشرینی دووەمی 2025 بەڕێوەبچێت.

 

ڕاگەیێنراوی فەرمی: موسەننا ئەلعەزاوی، ئەندامی ئەنجوومەنی پارێزگای بەغدا و کاندید لە لیستی هاوپەیمانی عەزم ڕایگەیاند، نووسینگەکەی لە ناوچەی یوسفیەی بەغدا ڕووبەڕووی هێرشێکی چەکداری بووەتەوە، کە بووە هۆی برینداربوونی یەکێک لە براکانی.

 

- ئەلعەزاوی بە تووندی سەرکۆنەی ھێرشەکەی کرد و بە هێرشێکی "ترسنۆکانە" ناوی برد و جەختی کردەوە کە "ئەم کارە نامۆیانە ساردو سڕمان ناکاتەوە لە بەردەوامیدان بە خزمەتکردنی خەڵکەکەمان و وەستان لەپاڵیان بەوپەڕی دڵسۆزی و بەرپرسیارێتییەوە، چونکە باوەڕمان پتەوە کە یاسا لەسەرووی ھەمووانەوەیە و تاوانباران بە سزای کارەکانیان دەگەن زوو بێت یان درەنگ."

 

ئەمەش بزانە: هەفتەی ڕابردوودا بە هەمان شێوە ئەندامێکی ئەنجوومەنی پارێزگای بەغدا و کاندید لە هاوپەیمانیی (سیادە) لە ڕێگەی بۆمبی لکێنراوەوە ئۆتۆمبێلەکەی کرایە ئامانج و بەهۆیەوە گیانی لەدەستدا و چوار لە پاسەوانەکانیشی برینداربوون.