ھێڵی ئاسمانیی عێراق خزمەتگوزارییەکی نوێی ئەلیکترۆنیی ڕادەگەیەنێت

ئاڤا نیوز

بەڕێوەبەرایەتیی ھێڵی ئاسمانیی عێراق، خزمەتگوزاری دەرکردنی کارتی سەرکەوتنی فڕۆکە (Boarding Pass) و دیاریکردنی کورسی بەشێوەی ئەلیکترۆنی لە ڕێگەی ئەپڵیکەیشنی فەرمی کۆمپانیا یان وێبسایتی حجزکردنی ئەلیکترۆنییەوە، ڕادەگەیێنێت.

 

بۆچی گرنگە: ئەم خزمەتگوزارییە پڕۆسەی گەشتکردن ئاسان دەکات و کات بۆ گەشتیاران دەگەڕێنێتەوە، ھاوکات ئاسوودەیی زیاتر بۆ گەشتیاران دابین دەکات و ئەزموونی گەشتکردن باشتر دەکات.

 

ڕاگەیێنراوی فەرمی: مەناف عەبدولموعنیم، بەڕێوەبەری گشتیی کۆمپانیاکە، لە ڕاگەیێنراوێکدا، ڕوونی کردەوە "ئەم خزمەتگوزارییە ڕێگە بە گەشتیار دەدات کورسییەکەی ھەڵبژێرێت و کارتی سەرکەوتنەکەی چەند ڕۆژێک پێش وادەی گەشتەکە بە خۆڕایی دەربکات، بەبێ ئەوەی پێویستی بە تێپەڕبوون بەسەر کاونتەری دەرکردنی بلیتی ھۆڵی فڕۆکەخانەدا ھەبێت. ھەروەھا گەشتیار دەتوانێت سوود لەم خزمەتگوزارییە وەربگرێت ئەگەر جانتای بچووکی (Hand Bag) لەگەڵدا بێت، یان دەتوانێت جانتا گەورەکانی بدات بە کاونتەری گەشتەکە و ڕاستەوخۆ بچێتە دەروازەی سەرکەوتن."

 

لەهەمان کاتدا: بەگوتەی عەبدولموعنیم، "ئەم ڕێکارە لە چوارچێوەی سادەکردنی ڕێوشوێنەکان، دابینکردنی کات و بەھێزکردنی ئاسوودەیی گەشتیارە لە ھەموو قۆناغەکانی گەشتەکەدا". ئاماژەی بەوەشدا "ئەم خزمەتگوزارییە یەکەمین کۆمەڵە خزمەتگوزاریی بازرگانی و ئەلیکترۆنیی نوێیە کە کۆمپانیاکە لە ماوەیەکی نزیکدا دەست بە جێبەجێکردنی دەکات، وەک بەشێک لە پلانێکی تۆکمە کە ئامانجی فراوانکردنی بنکەی خزمەتگوزارییە زیرەکەکان و باشترکردنی ئەزموونی گەشتکردنە لەگەڵ گواستنەوەی نیشتمانیدا."