کۆمیسیۆن بۆ ئاڤا: ھەڵبژاردن لە کاتی خۆیدا دەکرێت

ئاڤا نیوز

سەرۆکی تیمی میدیایی کۆمیسیۆنی باڵای سەربەخۆی ھەڵبژاردنەکانی عێراق ڕایدەگەیێنێت، کۆمیسیۆن ئامادەکارییەکانی بۆ ھەڵبژاردنی داهاتوو تەواو کردووە و جەختی لەسەر بەڕێوەچوونی پرۆسەکە لە 11ی تشرینی دووەمی 2025 کردەوە، ھاوکات ئاماژەی بە تۆمارکردنی ژمارەیەک سەرپێچی و کاردانەوەی جیاواز لە پارێزگاکانی عێراق کرد.

چیرۆكی سەرەكی: هەڵبژاردنی خولی شەشەمی ئەنجوومەنی نوێنەرانی عێراق لە 11-11-2025 بەڕێوەدەچێت، لە ڕۆژی 3ـی ئەم مانگەوە ماوەی بانگەشەی هەڵبژاردن دەستیپێكردووە و تاوەكو 8ـی 11ـی 2025 بەردەوام دەبێت، حیزب و لایەنە سیاسییەكانی بەشداربووی هەڵبژاردنەكە دەستیان كردووە بە ڕێكلامكردن بۆ كارنامە و بەڵێنەكانیان لە پێناو سەرخستنی لیستەكانیان.

لێدوانی فەرمی: د.عیماد جەمیل، بە ئاڤا میدیای ڕاگەیاند، کارەکانی کۆمیسیۆن بەگوێرەی کارنامەی دیاریکراو بەردەوامە و تەنیا مەشقپێکردنی کارمەندان ماوەتەوە، کە ئێستا لە قۆناغی کۆتاییدایە. سەبارەت بە کارتی بایۆمەتری، ئاماژەی بەوەدا کە نزیکەی سێ ھەزار و 500 کارت ماوەتەوە و تا ئێستاش یەک ملیۆن و 200 ھەزار کارت دابەش کراوە و پرۆسەی دابەشکردنی کارتەکانیش تا ڕۆژی دەنگدان بەردەوام دەبێت.

لەلایەکی دیکەوە: لەکاتێکدا بانگەشەی ھەڵبژاردن لە ھەرێمی کوردستان بە ھێمنی بەڕێوەدەچێت و ھیچ سەرپێچییەک لە دھۆک تۆمار نەکراوە و تەنیا یەک سەرپێچی لە سلێمانی ھەبووە، د.عیماد جەمیل ئاشکرای کرد کە لە پارێزگاکانی دیکەی عێراق بانگەشە زووتر دەستی پێکردووە و 400 سەرپێچی تۆمار کراون، کە بووەتە ھۆی سەپاندنی سزای دارایی بەسەر کاندید و حیزبەکاندا. ئەو ڕوونیشی کردەوە کە "لە کوردستان زیاتر لە ڕێگەی سۆشیال میدیا و میدیاوە بانگەشە دەکرێت، لەبەر ئەوەی بینەریان زیاترە."

زانیاریی زیاتر: سەبارەت بە چاودێری سەرپێچییەکان، جەمیل ڕایگەیاند کە کۆمیسیۆن 1079 تیمی ھەیە بۆ چاودێری سەرپێچییە ڕوواڵەتییەکان لە شەقام و گۆڕەپانەکان، و میدیا و ڕێکخراوەکانی کۆمەڵگەی مەدەنییش وەک ھاوبەشی ڕاستەقینە بۆ تۆمارکردنی سەرپێچییەکان کار دەکەن.

- لەبارەی سەردانی نوێنەری نەتەوەیەکگرتووەکان، د.عیماد جەمیل ئاشکرای کرد کە نەتەوە یەکگرتووەکان ئامادەیی تەواوی خۆی دەربڕیوە بۆ ھاوکاری و چاودێریکردنی ھەڵبژاردن لە ڕێگەی تیمە تایبەتمەندەکانەوە.

ئەمەش بزانە: سەبارەت بە دڵنیایی لە بەڕێوەچوونی ھەڵبژاردنەکە، جەمیل جەختی کردەوە کە "بەڵێ ھەڵبژاردن لە وادەی دیاریکراوی خۆی لە ڕۆژی 2025-11-11، بەڕێوەدەچێت." وتیشی: "کۆمیسیۆن ھەموو ئامادەکارییە تەکنیکی و لۆجیستی و ئیداری و سەرچاوە مرۆییەکانی تەواو کردووە." ھەروەھا پلانێکی گەورەی ئەمنیش ھەیە و قەدەغەی ھاتووچۆ نابێت بۆ ئاسانکاریی دەنگدەران. لە کۆتاییدا ئاماژەی بەوەدا کە 120 ھەزار کامێرای چاودێری لە بنکە و وێستگەکانی دەنگدان دادەنرێت بۆ چاودێریکردنی تەواوی پرۆسەکە.