ژیریی دەستکرد لە مەشق و هەڵسەنگاندن و تاقیکردنەوەی بۆردی پزیشکی بەکاردەهێنرێت

ئاڤا نیوز

کار بۆ بەکارهێنانی ژیریی دەستکرد لە مەشق و هەڵسەنگاندن و تاقیکردنەوەی بۆردی پزیشکی دەکرێت، بۆ ئەوەی لە چارەسەر کردن و سوود گەیاندن بە نەخۆش بەکاربهێنرێت، بۆ ئەم مەبەستەش شاندێکی ئەنجوومەنی باڵای کوردستانی بۆ پسپۆرییە پزیشکییەکان بەشداری لە کۆنفرانسێکی نێودەوڵەتی کردووە.

وێنە گەورەکە: هاوتەریب لەگەڵ پێشکەوتنی ژیریی دەستکرد و زیاتربوونی کاریگەری  لە هەموو بوارێکدا، لە هەرێمی کوردستان کار لەسەر سوود وەرگرتن لە ژیریی دەستکرد دەکرێت.

لێدوانی فەرمی: پ.د.ئاریانا شێخ خالس بەرزنجی، سەرۆکی ئەنجوومەنی باڵای کوردستان بۆ پسپۆڕییە پزیشکییەکان، بە ئاڤای گوت، وەک شاندی هەرێمی کوردستان بەشداریمان کردووە لە ڕێکخستنی کۆنفرانسی نێودەوڵەتیی ژیریی دەستکرد لە بواری پزیشکی و فێرکاریدا، ئەمەش هەنگاوێکی گرنگە لە سوود وەرگرتن لە ئەزموونی پێشکەوتنی وڵاتان بە تایبەت لە بەکارهێنانی ژیریی دەستکرد لە بواری لە مەشق و هەڵسەنگاندن و تاقیکردنەوەی بۆردی پزیشکی.

زانیاریی زیاتر: کۆنفرانسی نێودەوڵەتی ژیریی دەستکرد لە بواری پزیشکی و فێرکاریدا، ماوەی دوو ڕۆژ لە شاری لەندەن بەردەوام دەبێت، شاندی ژمارەیەک لە وڵاتان و زانکۆ بەناوبانگەکانی جیهان بەشداریان کردووە، تێیدا گفتوگۆی بەکارهێنانی ژیریی دەستکرد لە بواری پزیشکی دەکرێت.