ئاڤا بەدواداچوون بۆ گۆڕانکاری لە بەشەخۆراکی مانگانەی هاووڵاتیان دەکات

ئاڤا نیوز

ئاڤا میدیا بەدواداچوون بۆ گۆڕانکارییەکانی نێو لیستی بەشەخۆراکی هاووڵاتیان لە عێراق و هەرێمی کوردستان دەکات. بەڕێوەبەری بەڕێوەبەرایەتیی ڕێکخستنی پسوولەی خۆراکی هەولێر دەڵێت، هیچ شتێکی فەرمیمان لە بەغداوە پی نەگەیشتووە.

چیرۆکی سەرەکی: ماوەیەکە لە تۆڕە کۆمەڵایەتییەکان چەند بابەتێک لەسەر بەشەخۆراکی هاووڵاتیان و گۆڕانکارییەکانی نێو لیستی بەشەخۆراک بڵاودەکرێتە، بەشێکی هاونیشتمان پێیان وایە لە ساڵی داهاتوو گۆڕانکاریی بەسەردا دێت.

لێدوانی فەرمی: سیامەند قادر نانەکەلی، بەڕێوەبەری بەڕێوەبەرایەتیی ڕێکخستنی پسوولەی خۆراکی هەولێر بە ئاڤای ڕاگەیاند: هیچ شتێکی فەرمیمان لە بەغداوە پی نەگەیشتووە و هیچ خۆراکێک لە بەشەخۆراکی هاووڵاتیان کەم و زیاد نەکراوە، هەرکاتێک بەغدا بڕیارێکی لەم شێوەیە دەربکات، ئەوا بە دڵنیاییەوە هاووڵاتیانی کوردستانیش دەگرێتەوە و لێی سوودمەند دەبن.

ئەوەی پێویستە بیزانیت: ئاڤا میدیا زانیویەتی، دوای بە ئەلیکتیرۆنیکردنی پسوولەی خۆراک لە عێراق و هەرێمی کوردستان و سڕینەوەی ناوی سەدان هەزار کەس لەوانەی کۆچیان کردووە یان لە ئەوروپا دەژین، پێشنیازێک خراوەتەڕوو لەبری پارەی بەشەخۆراکی ئەو کەسانە، کوالێتیی بەشەخۆراکی هاووڵاتیان بەرزبکرێتەوە، بەڵام تاوەکو ئێستا نەبووەتە بڕیار و تەنیا گفتوگۆی لەبارەوە کراوە.

زانیاریی زیاتر: تەنیا لە سنووری پارێزگای هەولێر، ناوی زیاتر لە 150 هەزار کەس لە پسوولەی خۆراک سڕاوەتەوە و چیتر بەشەخۆراکیان ڕەوانە ناکرێت.