یەختێکی کۆچبەران لە ئیتاڵیا نقوم بوو ژمارەیەک کۆچبەری کورد خنکان

ئاڤا نیوز

یەختێکی کۆچبەران لە ئاوەکانی نێوان ماڵتا و ئیتاڵیا نقوم بوو، بە پێی زانیارییەکان 22 کەس خنکاون لەو ژمارەیە پێنج کەسیان کوردن.

وێنە گەورەکە: یەکێک لەو ڕێگا مەترسیدارانە کۆچبەران بۆ گەیشتن بە ئەوروپا بەکاریدەهێنن، ڕێگای دەریایە و ساڵانە ژمارەیەکی زۆری کۆچبەران بەهۆی نقومبوونی بەلەم و یەختەکان دەخنکێن، بەشێکیان بێسەروشوێن و تەنانەت تەرمەکانیشیان نادۆزرێنەوە.

چیرۆکی سەرەکی: سێ ڕۆژ لەمەوبەر 35 کۆچبەر لە ئاوەکانی لیبیاوە بەرەو ئیتاڵیا بەڕێکەوتوون، دوێنێ هەینی ئەو کۆچبەرانە ڕێگەیان ونکردووە، لەگەڵ ئەوەی داوای بەهاناوەچوونیان لە هەردوو لایەنی پەیوەندیدار لە ماڵتا و ئیتاڵیا کردووە، بەڵام کەس بە هانایانەوە نەچووە، دوێنێ نیوەڕۆ یەختەکە تیکشکاوە و نقوم بووە، بەهۆیەوە 22 کۆچبەر خنکاون. جگەمە لەمە بەلەمێکی دیکەی کۆچبەران لە ئیجە نقووم بووە و تاوەکو ئێستا هیچ زانیارییەک لەبارەی زیانە گیانییەکانی بڵاونەکراوەتەوە.

لێدوانی فەرمی: لەبارەی ئەو یەختەی لە لیبیاوە بەرەو ئیتالیا بەڕێکەوتووە، ڕەنج پشدەری، چالاکوانی بواری کۆچبەران بە ئاڤای وت: تا ئێستا خنکانی 22 کەس پشتڕاستکراوەتەوە، پێنج کەسیان خەڵکی دەڤەری حاجیاوا و ڕانیەن لە سنووری سلێمانی، چارەنووسی بەشێکی دیکەی کۆچبەرەکانیش نادیارە، کۆچبەرەکانی دیکەش خەڵکی وڵاتەکانی سوودان، ئەفغانستان، میسر و وڵاتە عەرەبییەکانی دیکەن.

لەلایەکی دیکەوە: سەرچاوەیەکی ئاگادار لە لیبیاوە بە ئاڤای گوت: ئەو یەختەی وەرگەڕاوە هیچ کوردێکی تێدا نەبووە، بەڵکو سەرجەم سەرنشینەکانی هاووڵاتیانی پاکستانی، بەنگلادیشی و میسری بوون.