بافڵ تاڵەبانی: لە کوردستان و عێراق گەندەڵی ناهێڵین

ئاڤا نیوز

یەکێتیی نیشتمانی کوردستان لە سلێمانی بانگەشەی هەڵبژاردنی دەستپێکرد، بافڵ تاڵەبانی چەند پەیامێکی نوێی ڕاگەیاند و گوتی: ئامانجی سەرەکی یەکێتی خزمەتکردنە، حکومەت دەبێت خزمەتی خەڵک بکات.

چیرۆکی سەرەکی: ئەمڕۆ شەممە 18-10-2025، بە ئامادەبوونی بافڵ تاڵەبانی، لە شاری سلێمانی یەکێتیی نیشتمانی کوردستان بە فەرمی بانگەشەی بۆ هەڵبژاردنی پەرلەمانی عێراق دەستپێکرد.

لێدوانی فەرمی: لە وتارێکدا، بافڵ تاڵەبانی، سەرۆکی یەکێتیی ڕەخنەی لە خزمەتگوزارییەکان گرت و وتی: هەلی کار نییە، کارەبا وەک پێویست نییە، وەکو پێویست خزمەتی کەمئەندامان ناکرێت، دەمانەوێ ئەمە ڕاست بکەینەوە.

ئەم قسانەی بافڵ تاڵەبانی لە کاتێکدایە مانگێک زیاترە کارەبای هەموو سەنتەری سلێمانی بووەتە 24 کاتژمێری و خەڵک مانگانە پارەیەکی کەمتر دەدات، جگە لەوەش پارێزگای هەڵەبجە بە هەموو قەزا و ناحیەکانیەوە، تاکە پارێزگای هەموو کوردستان و عێراقە کارەبای بەردەوامی هەیە.

سەرۆکی یەکێتی لە گوتارەکەیدا گوتیشی: ئایندەی هەموو عێراق دەگۆڕین و خزمەتی هەموو خەڵكی عێراق دەكەین، ئێمە ئەمنیەتی دهۆک و ئەمنیەتی بەسرە دەپارێزین، بۆیە چاومان لەوەیە هەموو عێراق دەنگمان پێ بدەن.

ئەمەشیان لەکاتێکدایە هەفتەیەک زیاترە خەڵکی بەسرە خۆپیشاندان دەکەن بەرامبەر نەبوونی خزمەتگوزاری و ئاوی خواردنەوەیان نییە، لەبەرامبەردا پارێزگای دهۆک ئاوی بەردەوام و کارەبای بەردەوامی هەیە، ئەمنیەتی دهۆکیش بەراورد ناکرێ بە هیچ شوێنێکی دیکەی عێراق.

لەلایەکی دیکەوە: بافڵ تاڵەبانی باسی پلانی حیزبەکەی کرد بۆ ڕووبەڕووبوونەوەی گەندەڵی و گوتی: پڕۆژەی بەرەنگاربوونەوەی گەندەڵیمان بۆ کوردستان و عێراقیش هەیە.

پەیامێکی هەڕەشە ئامێزیشی بۆ کاندیدانی لیستەکەی نارد و گوتی: لێتان قبووڵ ناکەم بچن لە بەغدا خەریکی ئەملا و ئەولا بن، دەبێت تەنیا خزمەت بکەن.