به‌ ناوى هه‌لی كاره‌وه‌ فێڵ له‌ هاووڵاتییان ده‌كرێت و پاره‌یان لێوه‌رده‌گیرێت

ئاڤا نیوز

ژمارەیەک پەیج و ئەکاونت لە تۆڕە کۆمەڵایەتییەکان، بەتایبەتی تیکتۆک، سناپچات و تێلیگرام، بانگەشەی درۆینە بۆ دۆزینەوەی هەلی کار دەکەن و بەم ڕێگەیەش فێڵ لە گەنجانی بێکار دەکەن.

چیرۆکی سەرەکی: ژمارەیەک پەیج بە شێوەیەکی گشتی هەلی کاری خەیاڵی بڵاودەکەنەوە کە مەرج و مووچەیەکی سەرنجڕاکێشیان هەیە. بۆ نموونە، ڕیکلام بۆ کارگەیەکی ئایسکرێم کراوە کە لقی لە هەولێر و سلێمانی هەیە، کارمەندێکی دەوێت بە مووچەی 700 هەزار دینار، هەینی پشوو بێت و دوو ڕۆژی تریش ئۆف بێت، لەگەڵ دابینکردنی نانخواردن و کرێی هاتووچۆ.

پاش ئەوەی گەنجێک پەیوەندی بەم پەیجانەوە دەکات و داوای کارەکە دەکات، داوای لێدەکرێت بڕێک پارە، 45 هەزار دینار، لە ڕێگەی خزمەتگوزارییە داراییەکانەوە وەکو (FIB) بنێرێت بە بیانووی جێبەجێکردنی مامەڵە کارگێڕییەکان یان زامنکردنی هەلی کارەکە. پاش ناردنی پارەکە، پەیوەندییەکانیان دەبڕدرێت و پارەکەش بۆ قوربانییەکە ناگەڕێنرێتەوە.

زانیاریی بەدەستهاتوو: دیندار مەهدی، گەنجێکی قوربانی، بە ئاڤای ڕاگەیاند، کە فێڵی لێکراوە. دەڵێت: "ڕیکلامیان بۆ کارگەیەکی شامپۆ دەکرد و کرێکاریان دەویست. منیش هەموو زانیارییەکانم بۆ ناردن، وتیان خەمت نەبێت و 100% وەردەگیرێیت. دواتر پێیان وتووم لە ڕێگەی FIBـیەوە 45 هەزار دینارمان بۆ بنێرە، دوای سێ ڕۆژی تر لە کارگەکەوە تەلەفۆنت بۆ دەکەن و یەکسەر دەست دەکەیت بە کارکردن."

دیندار دەڵێت، پاش ناردنی پارەکە، بۆ ماوەی شەش ڕۆژ هیچ وەڵامێکی وەرنەگرتووە. کاتێک داوای گەڕاندنەوەی پارەکەی کردووە، ڕاستەوخۆ بلۆک کراوە.

لێدوانی فەرمی: موقەدەم کیفاح حەسەن، وتەبێژی پۆلیسی هەولێر، لەمبارەیەوە ڕایگەیاند: "چەند پەیج و ئەکاونتێک ئێستا لەژێر چاودێریدان." داواشی لە خەڵک کرد کە زۆر وریابن، چونکە ڕێگەکانی فێڵکردن بە شێوەی ئۆنلاین زیاتر و ئاسانتر بوون. ناوبراو داوای لە هەر کەسێک کرد کە حاڵەتی لەمشێوەیەی بەرامبەر کرا، سکاڵا تۆمار بکات تاوەکو دەست بە ڕێکارە یاساییەکان بکرێت.

پۆلیسی هەولێر داوا دەکات هاووڵاتیان بە هیچ شێوەیەک پارە نەدەنە هیچ لایەنێک بە ناوی دۆزینەوەی هەلی کارەوە، بەتایبەت ئەو کەسانەی لە ڕێگەی تۆڕە کۆمەڵایەتییەکانەوە پەیوەندی دەکەن. داواش دەکات زانیاری و وردەکاریی ئەو پەیج و ئەکاونتانە تۆمار بکرێت و پۆلیس ئاگادار بکرێتەوە.