دوو چالاکوانی سیاسی کە یەکێکیان کوردە مەترسییان لەسەرە لە کازاخستانەوە ڕادەستی ئێران بکرێنەوە

ئاڤا نیوز

دوو چالاکوانی سیاسیی کە یەکێکیان کوردە دیپۆرتی کازاخستان دەکرێنەوە و مەترسیی ئەوەیان لەسەرە ڕادەستی کۆماری ئیسلامیی ئێران بکرێنەوە.

چیرۆکی سەرەکی: ڕۆژی هەینی 17-10-2025، دوو چالاکوانی سیاسیی کە یەکێکیان کوردە و ناوی "ئومید قەزوێنی"ـیە و خەڵکی شنۆیە، لەگەڵ محەممەدڕەزا عیلمی، خەڵکی کەرەج لەلایەن وڵاتی تورکیاوە دیپۆرتی کازاخستان کراونەتەوە، ئێستا مەترسیی ڕادەستکردنەوەیان بە کۆماری ئیسلامیی ئێرانیان لەسەرە.

لێدوانی فەرمی: نەشمیل عابدی، ئەندامی ڕێکخراوی مافی مرۆڤی هەنگاو بە ئاڤای ڕاگەیاند: ئومید قەزوێنی، ئەندامی کۆمەڵەی زەحمەتکێشانی کوردستانە، محەممەد ڕەزا عیلمی، چالاکی سیاسییە و لەکاتی چوونیان بۆ ئەورووپا لە تورکیا دەستگیر کراون، ئەو دوو چالاکوانە ماوەی مانگێک دەستبەسەرکراون، دواتر دیپۆرتی وڵاتی کازاخستان کراونەتەوە.

زانیاریی زیاتر: بە گوتەی نەشمیل عابدی، ڕێکخراوی هەنگاو نیگەرانە لەوەی ئەو دوو هاووڵاتییە ڕادەستی ئێران بکرێنەوە و لە لایەن ناوەندە ئەمنییەکانی کۆماری ئیسلامیی ئێران ئەشکەنجە بدرێن، بۆیە داوای ڕاگرتنی دەستبەجێی ڕادەستکردنەوەیان بە ئێران دەکەن و دەڵێت، پێویستە ڕەچاوی بنەماکانی مافی مرۆڤی بکرێت.

ئەمەش بزانە: ڕێکخراوی مافی مرۆڤی هەنگاو داوا لە ناوەند و ڕێکخراوە نێودەوڵەتییەکانی مافی مرۆڤ دەکات، لە ئەگەری ڕادەستکردنەوەی ئەو دوو چالاکوانە بە وڵاتی ئێران کاردانەوەیان هەبێت.