ئاڤای خەڵک؛ لە گوندێکی هەولێر ڕێگە نادرێت دانیشتووانەکەی خانوو دروست بکەن

ئاڤا نیوز

ژمارەیەک لە هاووڵاتیانی گوندی گردجووتیار لە شاری هەولێر، کە خاوەنی زەوی تاپۆن لە کەرتەکانی 7، 8 و 9ـی گوندەکە، گلەیی ئەوە دەکەن کە ڕێگەپێدانیان پێنادرێت بۆ دروستکردنی خانوو لەسەر زەوییەکانیان. زۆرێک لەمانە کرێچین و هیواخوازن بە زووترین کات بتوانن بچنە خانووی خۆیانەوە.

زانیاریی بەدەستهاتوو: یەکێک لە هاووڵاتیان بە ئاڤای وت، "ساڵانێکە خاوەنی ئەم زەوییانەین و تاپۆشە بەناوی خۆمانەوە، بەڵام مافی دروستکردنی خانوومان نییە. ئێمە کرێچین و دۆخی داراییمان باش نییە، دەمانەوێت لە کرێچێتی ڕزگارمان بێت."

لێدوانی فەرمی: کارزان عەبدولهادی، سەرۆکی شارەوانی هەولێر، بە ئاڤای وت، تەنیا گوندی گردجووتیار نییە تووشی ئەم کێشەیە بووە، بەڵکو چەند ناوچەیەکی دیکەش لە هەولێر هەمان گرفتیان هەیە.

سەرۆکی شارەوانی هەولێر ڕوونی کردەوە: "بۆ هەموو ئەو شوێنانە ئێستا خەریکی جیاکردنەوەی گەڕەک و کۆڵانەکان و دروستکردنی نەخشە و تۆماری ژمارەی گەڕەکەکانین. بەمزووانە ئەم کارانە تەواو دەبن و پرۆژە خزمەتگوزارییەکان دەستپێدەکەن."

وتیشی: "دوای تەواوبوونی ئەم قۆناغە، ڕێگەپێدان بە هاووڵاتیان دەدرێت بۆ ئەوەی دەست بە دروستکردنی خانوو بکەن لەسەر زەوییەکانیان."