ئاڤای خەڵک؛ گەڕەکی هەولێر لە هەڵەبجە بێ خزمەتگوزارییە

ئاڤا نیوز

هاووڵاتیانی گەڕەکی هەولێر لە شاری هەڵەبجە گلەیی و ناڕەزایەتی خۆیان دەردەبڕن سەبارەت بە نەبوونی خزمەتگوزارییە سەرەتاییەکان لە گەڕەکەکەیاندا، و ئاماژە بەوە دەکەن کە جیاوازی لە جێبەجێکردنی پڕۆژە خزمەتگوزارییەکاندا دەکرێت.

زانیاریی بەدەستهاتوو: بە گوتەی دانیشتووانی گەڕەکەکە، بەهۆی نەبوونی تۆڕی ئاو و ئاوەڕۆ و شەقام و کۆڵانی قیرتاوکراو دەناڵێنن. یەکێک لە دانیشتووان بە ئاڤای وت: "هیچ خزمەتگوزارییەکی پێویستی سەرەتاییمان بۆ نەکراوە. خۆمان بە ناچاری پارەمان کۆکردەوە و ئاوەڕۆیەکمان دروستکرد بۆ ئەوەی لە بۆن و پیسی ڕزگارمان بێت."

ئاماژەیان بەوەدا کە تەنیا دوو کۆڵان لەسەرەتا و کۆتایی گەڕەکەکە کۆنکرێت کراون و ئەوانی دیکە هەمووی خۆڵن.

لێدوانی فەرمی: چنور ناسیح، لێپرسراوی بەشی هونەری لە شارەوانی هەڵەبجە، بە ئاڤای ڕایگەیاند، هیچ جیاوازییەک لە جێبەجێکردنی پڕۆژەکاندا ناکرێت. وتی، "ئەو دوو کۆڵانەی کە کۆنکرێت کراون، چیمەنتۆکەی لە پڕۆژەیەکی دیکە مایەوە و بەشی ئەو دوو کۆڵانەی کرد."

سەبارەت بە ئاوەڕۆکەی کە هاووڵاتیان خۆیان دروستیان کردووە، چنور ناسیح وتی: "ئاوەڕۆکەیان بە شێوەیەکی زانستی دروست نەکراوە و دەبێت سەرلەنوێ تۆڕی ئاو و ئاوەڕۆیان بۆ دروست بکەینەوە."

هەروەها، لێپرسراوی بەشی هونەری لە شارەوانی هەڵەبجە ئاماژەی بەوەدا کە لە گەڕەکەدا زێدەڕۆیی زۆر هەیە و خەریکی پێداچوونەوەن بەوانەدا. لە کۆتاییدا دڵنیایی دایە هاووڵاتیان کە "پڕۆژەکانی ئەو گەڕەکە لە بەرنامەدان و خزمەتگوزارییەکانیان بۆ جێبەجێ دەکەین."