نەخۆشخانەی 100 قەرەوێڵەیی ئامێدی دەکرێتەوە

ئاڤا نیوز

نەخۆشخانەیەکەی 100 قەرەوێڵەیی لە قەزای ئامێدی دروستکراوە و سەرجەم کارەکانی تەواو بووە، وابڕیارە لە داهاتووێکی نزیک بکرێتەوە.

چیرۆکی سەرەکی: نەخۆشخانەی 100 قەرەوێڵەیی شۆرش – هێتیت لە کۆمەڵگای هێتیت لە سنووری قەزای ئامێدی، نەخۆشخانەیەکی گشتییە و بە گوژمەی 43 ملیۆن دۆلار بە شێوەی ستانداردی جیهانی دروستکراوە.

لێدوانی فەرمی: وارشین سلێمان، قایمقامی قەزای ئامێدی بە ئاڤا میدیای گوت: کارەکانی نەخۆشخانەکە تەواو بووە و سەرجەم ئامێر و پێدایستییەکان و پزیشک و کارمەندانی تەندروستی بۆ دابینکراوە، لە داهاتووێکی نزیک نەخۆشخانەکە دەکرێتەوە و دەکەوێتە خزمەت هاونیشتمانیان.

زانیاریی زیاتر: نەخۆشخانەکە لەسەر ڕووبەری 43 هەزار مەتر چوارگۆشە دروستکراوە، ڕووبەری باڵەخانەی نەخۆشخانەکە و بەشەکانی لەسەر رووبەری 21 هەزار مەتردووجا دروست کراوە و ئەم بەشانەی لەخۆگرتووە: (فریاکەوتن، چارەسەری سرووشتی، نۆرینگەی دەرەکی، تاقیگە، بانکی خوێن، منداڵان، ژنان و لەدایکبوون، تیشک و سۆنار، نەشتەرگەری، دەرمانخانە، شوشتنی گورچیلە، بەشی تەکنیکی ، یەکەی چارەسەر کردنی ئاوی پیس، شوێنی مانەوەی پزیشکەکان، بەشەکانی کارگێڕی و خزمەتگوزاری).