لە عێراق زیاتر لە 70 دەرمان بۆ چارەسەری شەکرە و پەستانی خوێن بەرهەمدەهێنرێت

ئاڤا نیوز

ڕاوێژکاری سەرۆکوەزیرانی عێراق بۆ کاروباری پیشەسازی، پەرەپێدان و کەرتی تایبەت، ڕایدەگەیێنێت، زیاتر لە 70 دەرمانی نوێی ناوخۆیی بۆ چارەسەری نەخۆشییەکانی شەکرە و پەستانی خوێن بەرهەمهێنراون، کە کۆی ژمارەی دەرمانە تۆمارکراوەکانی لە عێراقدا گەیاندووەتە دوو هەزار و 78 جۆر.

بۆچی گرنگە: بەرهەمهێنانی زیاتر لە 70 جۆر دەرمان لەناوخۆ بۆ شەکرە و پەستانی خوێن، وادەکات پێداویستییەکانی ناوخۆ پڕ بکاتەوە و بڕی کەمتری ئەو چارەسەرانە لە دەرەوە هاوردە بکرێن.

لێدوانی فەرمی: حەمودی لامی، ڕاوێژکاری سەرۆکوەزیران بۆ کاروباری پیشەسازی، بە ئاژانسی هەواڵی عێراقی ڕاگەیاند، ژمارەی دەرمانە تۆمارکراوەکان لە عێراق گەیشتووەتە دوو هەزار و 78 جۆر، ئەمەش دوای زیادبوونی کارگەکانی بەرهەمهێنان. ئاماژەی بەوەدا پێشتر ژمارەی دەرمانە تۆمارکراوەکان هەزار و 337 جۆر بوون. لەم ژمارە نوێیەدا، 33 دەرمانی نوێ بۆ چارەسەری شەکرە و 40 دەرمانی نوێش بۆ پەستانی خوێن زیاد کراون، کە پێشتر ژمارەیان زۆر کەمتر بووە.

لە هەمان کاتدا: ڕاوێژکاری سەرۆکوەزیران بۆ کاروباری پیشەسازی دووپاتیکردەوە، حکومەت پشتگیری کەرتی تایبەت دەکات لە بواری پیشەسازی دەرمان، ئەو باسی لەوەش کرد کە دەرمانە بەرهەمهێنراوەکانی ناوخۆیی هەموو پێداویستییەکانی نەخۆشەکان دابین دەکەن و لە ژێر چاودێری و کوالێتیی دەوڵەتدان، داوای لە هاووڵاتیان کرد متمانە بە دەرمانی عێراقی بکەن.

لەلایەکی دیکەوە: لامی ئاشکراشی کرد بەردی بناغە بۆ کارگەی نوێی دەرمان دانراوە، کە بە نوێترین تەکنەلۆژیای جیهانی دروست دەکرێن و بەرهەمی کوالێتی بەرز و توانای بەرهەمهێنانی گەورەیان دەبێت. ئەم پڕۆژانە بە هاوبەشی لەگەڵ کۆمپانیا گەورەکانی جیهان ئەنجام دەدرێن بۆ گواستنەوەی تەکنەلۆژیای نوێ بۆ عێراق.