ترەمپ: ئاگربەستی غەززە بەردەوامە

ئاڤا نیوز

دۆناڵد ترەمپ، سەرۆکی ئەمریکا دووپاتی دەکاتەوە کە ئاگربەستی نێوان ئیسرائیل و حەماس وەک خۆی ماوەتەوە، سەرەڕای هێرشە ئاسمانییەکانی ئیسرائیل بۆ سەر کەرتی غەززە، ڕۆژنامەیەکی ئیسرائیلیش دەڵێت، بڕیارە ئەمڕۆ ویتکۆف بگاتە ئیسرائیل.

چی ڕوودەدات: سەرەڕای ئاگربەست، ئیسرائیل و بزووتنەوەی حەماس، یەکتری بە پێشێلکردنی ئاگربەستی غەززە تۆمەتبار دەکەن، ڕۆژی یەکشەممە هێزی ئاسمانیی ئیسرائیل چەند ناوچەیەکی لە شاری ڕەفەح بۆمباران کرد.

لێدوانی فەرمی: دۆناڵد ترەمپ، سەرۆکی ئەمریکا دەڵێت: ئاگربەستی غەززە هێشتا بەردەوامە، لە هەر حاڵەتێکدا بە شێوەیەکی گونجاو مامەڵە لەگەڵ بابەتەکەدا دەکرێت.

بەتەنیشت ئەم بابەتەوە: ڕۆژنامەی تایمز ئۆف ئیسرائیل لە زاری بەرپرسێکی ئەمریکییەوە بڵاویکردەوە، ڕۆژی دووشەممە ستیف ویتکۆف، نێردەی ترەمپ بۆ ڕۆژهەڵاتی ناوەڕاست  و جارێد کوشنەر دەگەنە ئیسرائیل و بڕیارە ڕۆژی سێشەممە جەی دی ڤانس، جێگری سەرۆکی ئەمریکاش بگاتە ئیسرائیل، لەگەڵ بنیامین نەتەنیاهۆ سەرۆکوەزیرانی ئیسرائیل و بەرپرسانی باڵای دیکە بۆ پێشخستنی ڕێککەوتنەکە کۆدەبنەوە.