زێلێنسکی داوا لە ترەمپ دەکات پووتین بە ئاگربەست ڕازی بکات

ئاڤا نیوز

دوای ئەوەی دۆناڵد ترەمپ سەرۆکی ئەمریکا توانی ڕێککەوتن لەنێوان ئیسرائیل و حەماس ڕابگەینێت، سەرۆکی ئۆکرانیا چاوی لەوەیە ئەمریکا بتوانێت ڕووسیا بە ڕێککەوتنی ئاشتی ڕازی بکات دەشڵێت، پووتین لە حەماس بەهێزترە، شەڕەکەش گەورەترە.

پەیامی فەرمی: ڤۆلۆدیمیر زێلێنسکی، سەرۆکی ئۆکرانیا لە چاوپێکەوتنێکدا لەگەڵ کەناڵی NBS NEWS لە وەڵامی پرسیارێکدا کە ئایا ترەمپ دەبێت تووندتر بێت بەرامبەر پووتین وتی، 'پووتین لە حەماس بەهێزترە، دەشڵێت، خاوەن دووەم گەورەترین سوپای جیهانە، هەر بۆیە دەبێت گوشارەکان لەسەر ڕووسیا زیاتر بکرێن'

ئەوەی ئێستا ڕوودەدات: هێرشەکانی ڕووسیا و ئۆکرانیا بۆ سەر یەکتر بەردەوامن، لەم دواییەدا هەردوولا هێرشەکانیان بۆ سەر کەرتی وزەی یەکتریی زیاتر کردووە بەمەبەستی لاوازکردنی ژێرخانی ئابووری یەکتری. 

لەلایەکی دیکەوە: وەزارەتی بەرگری ڕووسیا ڕایگەیاندووە، لە ماوەی 24 کاتژمێردا 323 فڕۆکەی بێفڕۆکەوانی ئۆکرانیی و دوو بۆمبی ڕێنماییکراو و سێ موشەکهاوێژیان خستووەتە خوارەوە.

بڵاوکراوەی فەرمی: زێلێنسکی دەڵێت، لە ماوەی هەفتەی ڕابردوودا ڕووسیا زیاتر لە سێ هەزار و 270 فڕۆکەی بێفڕۆکەوانی هێرشبەر و هەزار و 370 بۆمبی ئاسمانی ڕێنماییکراو و نزیکەی 50 مووشەکی دژ بە ئۆکرانیا هەڵداوە.

بەتەنیشت ئەم بابەتەوە: لە نوێترین پێشهاتدا ئۆکرانیا هێرشی کردووەتە سەر وێستگەی پرۆسێسکردنی غازی ڕووسیا، سەرۆک ئەرکانی گشتیی هێزەکانی ئۆکرانیا دەڵێت، لە ناوچەی ئۆرنبۆرگ لە ڕووسیا لە وێستگەیەکی پرۆسێسکردنی غازیان داوە و بووەتە هۆی تەقینەوەیەکی گەورە.