ئاڤای خەڵک؛ هۆشداری لەبارەی پیسکردنی ژینگەی ناو بازاڕی هەولێر دەدرێت

ئاڤا نیوز

بەپێی گرتە ڤیدیۆیەک کە بۆ ئاڤا نێردراوە و هاووڵاتیان نیگەرانی خۆیان دەربڕیوە لەبارەی ئەو مۆلیدە بچووکانەی کە شەوان لە نزیک قەڵا و بەردەم بازاڕی قەیسەری لە لایەن کاسبکارانەوە دادەنرێن. بە بڕوای ئەوان، ئەم مۆلیدانە سیمای ئەو ناوچە گەشتیارییەیان شێواندووە.

ببینە و ببیستە: هاوڵاتییان لە گرتە ڤیدیۆییەکە ئاماژە بەوە دەکەن کە "ئەو مۆلیدانە هەم دەنگیان زۆرە و هەم پیسی و پاشماوە لە شوێنەکەدا بڵاودەکەنەوە." یەکێک لە هاوڵاتییەکان دەڵێت: "ئەم شوێنە سەنتەری شارە و گەشتیارێکی زۆر ڕووی تێدەکات. حکومەتیش خزمەتی زۆری کردووە، گوناحە بەم شێوەیە سیمای بشێوێنرێت و پاکوخاوێنی تێکبچێت."

لێدوانی فەرمی: کارزان عەبدولهادی، سەرۆکی شارەوانی هەولێرەبە ئاڤای ڕایگەیاند: "تیمەکانمان بە بەردەوامی لە هەموو شوێن و ناوچەکانی شار بەدواداچوون بۆ سەرپێچییەکان دەکەن. تیمەکانمان نابنە ڕێگر لە کار و کاسبی خەڵک، بەڵام ڕێگە بە ناشرینکردن و پیسکردنی ژینگەی شار نادرێت، بەتایبەت لە نزیک قەڵا و ناوچە گەشتیارییەکان. بەدواداچوون بۆ ئەو بابەتە دەکەین و هەر کەسێک سەرپێچی کردبێت سزای دەدەین و ڕێگە بەوە نادەین ئەم دیاردەیە بەردەوام بێت."