باکووری کوردستان تینووە و 52 ساڵە بێبارانی وای بە خۆیەوە نەبینیووە

ئاڤا نیوز

ماوەی 12 مانگی ڕابردوو هێندە کەم باران باریووە، باکووری کوردستان 52 ساڵە شتی وای بە خۆیەوە نەبینیووە و هەر مەتر چوارگۆشەیەک بە تێکڕایی 422.5 میلیمەتر بارانی بەرکەوتووە.

بڵاوکراوەی فەرمی: وەزارەتی گۆڕانی کەشوهەوا، ژینگە و شارسازیی تورکیا "ڕاپۆرتی ساڵی ئاو 2025"ـی بڵاو کردەوە کە باسی لە دۆخی ئاو و باران بارین کردووە لە تورکیا و باکووری کوردستان لە 1-10-2024 بۆ 1-10-2025 و بەم پێیەیش جگە لە ناوچەکانی باکووری تورکیا، ئەگەری ڕوودانی وشکەساڵییەکی تووند هەیە لە تەواوی ناوچەکانی دیکە و بەتایبەتیش باکووری کوردستان.

بە تەنیشت ئەم بابەتەوە: لە کاتێکدا ڕێژەی باران بارین لە باکووری کوردستان 53% کەمی کردووە، لە ناوەڕاستی ئەنادۆڵ لە 35% و لە ناوچەی مارمارا لە 34% کەمی کردووە.

ئەوەی پێویستە بیزانیت: ڕێژەی باران بارین لە دیلۆک، مێردین، ڕها، وان، باتمان، سێرت، شرنەخ 65%، سەمسور و مەڕەش 52% و لە جۆلەمێرگیش 50% کەمی کردووە.

لەلایەکی دیکەوە: بە هۆی کەمی بارانبارینەوە، بەرهەمهێنانی هەنجیر، قەیسی و گێلاس لە باکووری کوردستان بە ڕێژەی 80% کەمی کردووە.