ئەمڕۆ کۆتا بەشی کارمەندانی سەر سندوقەکانی دەنگدان ڕاهێنانیان پێ دەکرێت

ئاڤا نیوز

لە چوارچیوەی ئامادەکارییەکانی کۆمیسیۆن بۆ هەڵبژاردنی پەرلەمانی عێراق، 90٪ـی کارمەندانی سەر سندووقەکانی دەنگدان لە هەرێمی کوردستان راهێنانیان پێکراوە، ئەوەی ماوەتەوە ئەمڕۆ ڕاهێنانیان پێ دەکرێت.

وێنە گەورەکە: بۆ هەر هەڵبژاردنێك کە لە عێراق و هەرێمی کوردستان بەڕێوەدەچێت، کۆمیسیۆن بەپێی پێویستی و ژمارەی بنکە و وێستگەکانی دەنگدان، کارمەندانی سەر سندووقەکانی دەنگدان بەشێوەی گرێبەستی کاتی بۆ ڕۆژی هەڵبژاردن دادەمەزرێنێت، ئەو کارمەندانەش بەپێی جۆری ئەو کارەی لە ڕۆژی هەڵبژاردن پێی ڕادەسپێردرێت، مەشق و ڕاهێنانیان پیدەکرێت.

لێدوانی فەرمی: نەبەرد عومەر، بەرپرسی دەستەی هەڵبژاردنەکانی هەرێمی کوردستان لە کۆمیسیۆنی باڵای هەڵبژاردنەکانی عێراق بە ئاڤا میدیای گوت: 90٪ـی کارمەندانی سەر سندووق ڕاهێنانیان پێکراوە، ئەو 10٪ی ماوە ئەمڕۆ ڕاهێنانەکانیان دەست پێدەکات.

زانیاریی زیاتر: لە هەرێمی کوردستان زیاتر لە 35 هەزار کارمەندی سەر سندووق دانراون کە پرۆسەی هەڵبژاردن لە دەنگدانی گشتی و تایبەت لە هەرسێ بازنەی سلێمانی و هەڵەبجە، دهۆک و هەولێر بەڕێوەدەبەن.

باکگراوند: بۆ هەڵبژاردنی پەرلەمانی عێراق، بۆ هەردوو دەنگدانی گشتیی و تایبەت، کۆمیسیۆن پێویستی بە 250 هەزار کارمەندی سەر سندووقی دەنگدان هەیە، بەڵام زیاتر لە 823 هەزار کەس داواکارییان پێشکەش کردبوو، ڕۆژی 14ـی مانگی ڕابردووش ناوی کارمەندەکان بە تیروپشک ڕاکێشرا.

ئەمەش بزانە: پاداشتی هەر کارمەندانی سەر سندووق بەگوێرەی ئەرکەکەی لە نێوان 150 هەزار بۆ 400 هەزار دینار دەبێت.