لە سنووری هەولێر ڕێگایەکی دیکە دەکرێت بە دووساید

ئاڤا نیوز

لە درێژەی هەوڵەکانی حکومەتی هەرێمی کوردستان بۆ پەرەپێدانی ژێرخانی ڕێگاوبان، پڕۆژەیەکی نوێی دروستکردنی ڕێگاوبان ڕاگەیەندرا. بڕیارە ڕێگای نێوان بەستۆرە و گۆمەسپان، کە بە ڕێگای هەنارە ناسراوە و لە ئێستادا ڕێگایەکی ناخۆش و پڕ تاسەیە، بکرێتە ڕێگایەکی دوو ساید و کوالێتیی بەرز.

وێنە گەورەکە: لە ماوەی کابینەی نۆیەمدا کۆمەڵێك ڕێگای نوێ و ستراتیژی بەپێی ستانداردە جیهانییەکان لە ناوچە جیاوازەکانی کوردستان دروست کراون و خراونەتە خزمەتی هاونیشتمانیانەوە، بەجۆرێک کارئاسانیی تەواوی بۆ هاونیشتمانیان و گەشتیاران کردووە و ڕێگاکانی بەپێی کات کەمکردووەتەوە.

لێدوانی فەرمی: ئەمیر عەبدولخالق، بەڕێوەبەری پڕۆژەکانی ڕێگاوبانی کۆمپانیای هێمن گرووپ بە ئاڤای وت: ڕێگای بەستۆڕە - گۆمەسپان نزیکەی 16 کیلۆمەتر دەبێت و دوو سایدە، پانی هەر سایدێک 11 مەترە و لە دوو ڕێڕەو لەگەڵ ڕێڕەوێکی فریاگوزاری بۆ هەر ئاراستەیەک پێدێت، ئێستا لە قۆناغی نەخشەسازییە و لە ماوەی داهاتوو جێبەجی دەکرێت.

لەلایەکی دیکەوە: لەبارەی ڕێگای کەسنەزان - گۆمەسپان، ئەمیر عەبدولخالق وتی: سایدێکی ڕێگاکە تەواو بووە و کارەکانی پڕۆژەکە بەردەوامە و کۆتایی ئەمساڵ تەواو بەڕووی شۆفێراندا دەکرێتەوە. دەبوو پڕۆژەکە بە دوو ساڵ تەواو بکرێت، بەڵام ماوەی چوار مانگە کاری تێدا دەکەین، بە تەواوبوونی لە کۆتایی ئەمساڵ ماوەی کارکردن تێیدا دەبێتە شەش مانگ، ئێمە تەواوی هەوڵەکانی خۆمان بۆ تەواوکردنی پڕۆژەکە خستووەتە گەڕ.