بەرازیل کانزای ژێر زەوی وڵاتەکەی وەک کارت بەرامبەر ئەمریکا بەکاردێنێت

ئاڤا نیوز

لە دانوستانەکانی هەڵگرتنی باجی گومرگیدا بەرازیل خاوەنی کارتێکی بەهێزە لەگەڵ ئەمریکا، چونکە ژێر خاکەکەی پڕە لە کانزای دەگمەن کە ماددەی بنەڕەتین بۆ پیشەسازییە مۆدێرنەکان.

زانیاریی بەدەستهاتوو: بەڕازیل دووەم گەورەترین یەدەگی ئەو کانزایانەی هەیە کە لە جیهاندا هەن و  لە هەموو شتێکدا بەکاردێن، لە ئۆتۆمبێلە کارەباییەکان و پانێڵی وزەی خۆر و مۆبایلە زیرەکەکانەوە تا دەگاتە بزوێنەری فڕۆکە و مووشەکە ئاراستەکراوەکان.

لێدوانی فەرمی: ئەلێکساندەر سیلڤیرا، وەزیری کانزاکان و وزەی بەرازیل ڕایگەیاند، لە نێوان توانای کانزاکانی ئێمە و سەرمایەی ئەمریکادا بەرژەوەندییەکانمان یەکن.

ئەوەی پێویستە بیزانیت: ئەمریکا بەڕێژەی 50% باجی گومرگی زیادەی بەسەر کاڵا هەناردەکراوەکانی بەرازیل بۆ ئەمریکا سەپاندووە.

ئەمەش بزانە: کانزا دەگمەنەکان کۆمەڵێکن لە 17 کانزای قورس کە زۆر گرنگن تا ڕادەیەک خاوەنی کاریگەری جیۆپۆلەتیکین، بەپێی دەزگای ڕووپێوی جیۆلۆجیی ئەمریکا، چین خاوەنی نزیکەی نیوەی یەدەگی جیهانی ئەم کانزایانەیە، کە دەکاتە نزیکەی 48 ملیۆن تۆن و بەرازیلیش خاوەنی نزیکەی 21 ملیۆن تۆنە.