گەورەترین سەرچاوەی ئاوی شیرین لە ئێران بە تەواویی وشک بووە

ئاڤا نیوز

سەرچاوەی ئاوی کوهڕەنگ، کە بە گەورەترین سەرچاوەی ئاوی شیرین لە ئێران دادەنرێت و دەکەوێتە ناوچەیەکی کوردنشین لە زاگرۆس، بە تەواوی وشکبوونی ڕاگەیێنرا.

چیرۆکی سەرەکی: سەرچاوەی ئاوی کوهڕەنگ، کە دەکەوێتە پارێزگای چوارمەحاڵ و بەختیاری و بەشێکە لە زنجیرەچیای زاگرۆس، ساڵانە سەرچاوەی سەرەکی ئاوی خواردنەوە و کشتوکاڵ بووە بۆ چەندین ناوچە. بەڵام ئەمساڵ، دۆخی سەرچاوەکە بە تەواوی گۆڕاوە.

ببینە و ببیستە: ڤیدیۆ و وێنە بڵاوکراوەکان بەراوردی دۆخی سەرچاوەکە لە ساڵی ڕابردوو و ئەمساڵ دەکەن، کە ساڵی ڕابردوو ناوچەیەکی گەشتیاری و پڕ ئاو بووە، بەڵام ئەمساڵ بووەتە ناوچەیەکی وێران و بێ ئاو، وەک "ناوچەیەکی مردوو" وەسف دەکرێت.

هۆکارە زانراوەکان: شارەزایانی ژینگە و ژینگەدۆستان هۆکاری وشکبوونی تەواوەتی ئەم سەرچاوە گەورەیەی ئاوی شیرین دەگەڕێننەوە بۆ چەند فاکتەرێک.

یەکەم؛ ناشارەزایی لە گواستنەوەی ئاوی سەرچاوەکە بۆ هەندێک ناوچەی دیکە.

دووەم؛ ناعەدالەتی لە دەستکاریکردنی ژینگەی ئەم ناوچەیە و گۆڕانکاری لە ڕێڕەوی ئاوەکەی بۆ ناوچە فارس نشینەکان.

سێیەم؛ کاریگەری "وشکەساڵی" کە لە ساڵانی ڕابردوودا بەشێکی زۆری ئێران و ڕۆژهەڵاتی کوردستانی گرتووەتەوە.