سەرەڕای هەناردەی نەوتی کوردستان؛ داهاتی نەوتی عێراق نزیکەی 200 ملیۆن دۆلار کەم دەکات

ئاڤا نیوز

 

وەزارەتی نەوتی عێراق داهاتی فرۆشتنی نەوتی بۆ مانگی ئەیلوولی ئەمساڵ بڵاوکردەوە و دەڵێت، مانگی ڕابردوو داهاتیان شەش ملیار و 962 ملیۆن دۆلار بووە، بەوپێیەش بەراورد بە مانگی هەشت، مانگی ڕابردوو داهاتی نەوت 198 ملیۆن و 129 هەزار دۆلار کەمی کردووە.

 

بۆچی گرنگە: داهاتی فرۆشتنی نەوت سەرچاوەی سەرەکی حکومەتی عێراقە بۆ دابینکردنی مووچە و پڕۆژە خزمەتگوزارییەکان چونکە فرۆشتنی نەوت نزیکەی 90%ـی داهاتی دەوڵەت دابین دەکات، هەرچەند داهاتی نەوتیش کەم بکات ئەوەندەش ئاستەنگی بۆ دابینکردنی مووچە و پڕۆژەکان دروستدەبێت.

 

بڵاوکراوەی فەرمی؛ وەزارەتی نەوتی عێراق بڵاوی کردەوە، مانگی ڕابردوو عێراق 102 ملیۆن و 150 هەزار و 362 بەرمیل نەوتی هەناردەی دەرەوە کردووە، داهاتەکەشی شەش ملیار و 962 ملیۆن و 124 هەزار دۆلار بووە.

 

ئەو مانەیە دەگەیێنێت: هەرچەندە ڕۆژی 27ی ئەیلوولی 2025، هەناردەی نەوتی هەرێمی کوردستان لە رێگەی بۆرییەوە دەستیپێکردەوە، بەڵام وەزارەتی نەوت دەڵێت، کۆی ئەو نەوتەی فرۆشراوە لە کێڵگەکانی ناوەڕاست و باشووری عێراق بەرهەمهێنراوە، ئەوەش مانای وایە تا سەرەتای ئەم مانگە ڕەنگە نەوتی کوردستان لە کۆگاکانی هەڵگرتنی نەوتی عێراق لە بەندەری جەیهان هەڵگیرابێت و لە سەرەتای ئەم مانگەوە دەست بە فرۆشتنی کرابێت.

 

باکگراوند: مانگی ئاب وەزارەتی نەوتی عێراق 104 ملیۆن و 806 هەزار و 884 بەرمیلی هەناردەی دەرەوە کردبوو، داهاتەکەشی حەوت ملیار و 160 ملیۆن و 253 هەزار دۆلار بووە.