پارەی مووچەی مانگی هەشت خرایە سەر هەژماری وەزارەتی دارایی

ئاڤا نیوز

 

پارەی مووچەی مانگی هەشتی مووچەخۆرانی کوردستان خرایە سەر هەژماری وەزارەتی دارایی کوردستان و بڕەکەی 945 ملیار دینارە. وەزارەتی دارایی دەڵێت، لە دوو ڕۆژی داهاتوودا دەست بە دابەشکردنی مووچە دەکرێت.

 

وێنە گەورەکە؛ دوای ئەوەی هەفتەی ڕابردوو وەزارەتی دارایی هەرێمی کوردستان بڕی 120 ملیار دینار داهاتی نانەوتی خستە سەر هەژماری بانکیی وەزارەتی دارایی عێراق، ئەمڕۆ 945 ملیار و 817 ملیۆن دینار بۆ مووچەی مووچۆران تەمویل کرا، لە چەند کاتژمێری داهاتوو خشتەی مووچە بڵاو دەکرێتەوە و دەست بە دابەشکردنی مووچە دەکرێت.

 

ڕاگەیێنراوی فەرمی؛ وەزارەتی دارایی و ئابووریی کوردستان بڵاوی کردەوە، ئەمڕۆ یەکشەممە بڕی  (945،817،000،000) ملیار دینار وەک تەمویلی مووچەی مانگی ئابی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندیی عێراق.

 

هەنگاوی داهاتوو؛ سەرچاوەیەک لە وەزارەتی دارایی هەرێمی کوردستان بە ئاڤای گوت، لە دوو ڕۆژی داهاتوو دەست بە دابەشکردنی مووچەی مانگی هەشت دەکرێت.