ئەو شەهێنەی لە سنووری گەرمیان ڕاوکرا گەڕێنرایەوە نێو سرووشت

ئاڤا نیوز

دوای نزیکەی حەوت ڕۆژ لە ڕاوکردنی باڵندەی " شەهێن" شاهین لە سنووری گەرمیان، گەڕێنرایەوە بەڕێوەبەرایەتیی پۆلیسی دارستان و ژینگە، بڕیارە لەشوێنێک دوور لە چاوی کامێراکان ئازاد بکرێت.

چیرۆکی سەرەکی: لەماوەی چەند ڕۆژی ڕابردوو چەند ڕاوچییەک، "شەهێنێک" ڕاو دەکەن و ڤیدیۆکەی لە تۆڕە کۆمەڵایەتییەکان بڵاودەکەنەوە، ڕێکخراوەکانی ژینگە سکاڵایان تۆمار کرد و داوای دەستگیرکردنی ڕاوچییەکانیان کرد، ئەمڕۆ خۆیان باڵندەکەیان ڕادەست کرد.

لێدوانی فەرمی: عەمید شوان محەممەد، بەڕێوەبەری گشتیی پۆلیسی دارستان و ژینگەی گەرمیان لە کۆنگرەیەکی ڕۆژنامەوانیدا گوتی، "باڵندەکە گەڕێنراوەتەوە لای ئێمە، دوور لەچاوەکان بە سرووشت شاد دەکرێتەوە، هاوکات ڕێککاری یاسایی بەرامبەر بە ڕاوچییەکان دەگیرێتەبەر، چونکە ڕاوکردن لە هەرێمی کوردستان قەدەغەیە."

بۆچوونی لایەنی بەرامبەر: ئومێد مەجید، یەکێک لە ڕاوچییەکانە و بە ئاڤای گوت، "باڵندەکە لەنێوان ناحیەی جەبارە و قەرەتەپە ڕاوکراوە، ئێمە مۆڵەتی حکومەتی عێراقمان هەیە بۆ ڕاوکردنی، ئەو باڵندەی ڕاومانکردووە  نرخەکەی تەنها لەنێوان ملیۆنێک بۆ ملیۆن و نیوێک دینارە."

ئەوەی پێویستە بیزانیت: شەهێن مێیەی بازە، جۆرێکی دەگمەنی باڵندەیە و لە هەرێمی کوردستان هەیە، لە کوردستانیش تەنها لە ناوچەی گەرمیان هەیە، لە وڵاتانی کەنداویش هەیە، بەڵام وەکوو ئەم جۆرەی کوردستان نییە.