هەژدەیەمین فێستیڤاڵی شانۆی سەرشەقام لە مەریوان دەستپێدەکات

ئاڤا نیوز

بە بەشداریی 43 گرووپی ناوخۆی هەژدەیەمین خولی فێستیڤاڵی نێودەوڵەتیی شانۆی سەرشەقامی مەریوان دەستپێدەکات. 

چیرۆکی سەرەکی: هەژدەیەمین خولی فێستیڤاڵی نێودەوڵەتیی شانۆی سەرشەقامی مەریوان رۆژی یەکشەممە دەستپێدەکات، فێستیڤاڵەکە لە حەوت بەش و بە بەشداریی 43 گرووپ و بەبێ بەشداریی گرووپە بیانییەکان بەڕێوەدەچێت. 

لێدوانی فەرمی: فاتێح بادپەروا، بەڕێوەبەری فێستیڤاڵی شانۆی سەرشەقامی مەریوان، بە ئاڤامیدیای گوت: 210 گرووپی شانۆ لە ئێران و ڕۆژهەڵاتی کوردستانەوە بەرهەمەکانیان بۆ ئەم خولەی فێستیڤاڵ ناردبوو، بەڵام 43 گرووپ بۆ بەشی کێبڕکێ هەڵبژێران.

- فاتێح بادپەروا گوتی: لە فێستیڤاڵی ئەمساڵدا کەلێنێکی گەورەمان هەیە و گرووپە بیانییەکان نەیانتوانی بەهۆی دۆخی تایبەتی ئێرانەوە بەشداریی بکەن، گەرچی 43 گرووپ لە 38 وڵاتەوە بەرهەمەکانیان بۆ بەشداریی لە فێستیڤاڵ ناردبوو.

زانیاریی زیاتر: مەریوان وەک پایتەختی شانۆی سەرشەقام دەناسرێت، لە ساڵانی ڕابردوودا چەندین گرووپی شانۆ لە باشووری کوردستان و وڵاتانی ئەوروپایی و وڵاتانی دیکەوە بەشدارییان لە فێستیڤاڵدا دەکرد.