کاندیدێکی پارتی بە شێوازێکی جیاواز بانگەشە دەکات

ئاڤا نیوز

 

زیاد مامۆستا ئەحمەد، کاندیدی ژمارە 19ـی پارتی دیموکراتی کوردستان 275 بە شێوازێکی جیاواز لە کاندیدەکانی دیکە دەستی بە بانگەشەی هەڵبژاردن کردووە و سەرنجی زۆری بەلای خۆیدا ڕاکێشاوە. ئەو دوور لە بەکارهێنانی تیمی گەورە و خەرجی زۆر، بە شێوەیەکی تاکەکەسی پۆستەرەکانی خۆی دروست دەکات و لەسەر شەقامەکان هەڵیان دەواسێت.

 

بۆچی گرنگە؛ ئەم هەنگاوەی زیاد ئەحمەد لە کایەی سیاسی و هەڵبژاردنەکاندا بە دیمەنێکی نوێ دادەنرێت، کە تێیدا کاندیدەکان بە گشتی پشت بە تیمی گەورە و کۆمپانیای تایبەت دەبەستن بۆ بەڕێوەبردنی بانگەشەکانیان.

 

لێدوانی فەرمی؛ لە لێدوانێکی تایبەتدا بۆ ئاڤا میدیا، زیاد ئەحمەد هۆکاری ئەم کارەی بۆ دوو خاڵی سەرەکی گەڕاندەوە. یەکەمیان پەیوەندی بە کەسایەتی خۆیەوە هەیە، کە حەز دەکات کارەکانی بە دەستی خۆی ئەنجام بدات. ئەو ووتی: "یەکەمیان بونیەی من وایە پێم خۆشە بە دەستەکانی خۆم کارەکان بکەم و نەک لە ئێستاوە سەدان تیم بنێرمە سەر شەقامەکان بە جۆرێک جیاکردنەوەی خۆم بێت لە خەڵک."

 

زانیاریی زیاتر؛ هۆکاری دووەمیش، وەک خۆی ئاماژەی پێدا، پەیوەستە بە لایەنی داراییەوە. ناوبراو ڕایگەیاند کە دروستکردنی پۆستەرەکان لەلایەن پیشەوەرانەوە تێچوویەکی زۆری دەوێت و ئەمەش ئەرکێکی قورسی دەخستە سەر شانی. زیاد ئەحمەد دەڵێت: "ئەم هەموو پۆستەرە گەر لای ئاسنگەرەکان دروست بکرێت، ئەوە لە ڕووی مادییەوە ئەرکێکی قورس دەکەوێتە سەرم، بۆیە باشترین کار ئەوەیە ئێستا دەیکەم."