زیاتر لە 7 هەزار پارچە زەوی لە سنووری هەولێر دابەشکران

ئاڤا نیوز

قۆناغی سێیەمی پرۆسەی دابەشکردنی زەوی لە هەولێر دەستیپێکرد، تیروپشک بۆ زیاتر لە حەوت هەزار پارچە زەوی دیکە کرا و هەزاران پارچە زەوی دیکەیش وەک قەرەبوو دەدرێن بە جووتیاران.

وێنە گەورەکە: لە سنووری سەرۆکایەتیی شارەوانیی هەولێر، نزیکەی 70 هەزار فەرمانبەر و خانەنشین و پێشمەرگە، مەرج و ڕێنمایی پێدانی زەوی دەیانگرێتەوە، لەو ژمارەیە 17 هەزار کەسیان زەوییان بەسەردا بەشکراوە، قۆناغ بە قۆناغ ئەوانەی دیکەیش زەوییان پێدەدرێت.

لێدوانی فەرمی: ساسان عەونی، وەزیری شارەوانی و گەشتوگوزار لە کۆنگرەیەکی ڕۆژنامەوانیدا گوتی، "ئەمڕۆ حەوت هەزار و 500 پارچە زەوی بەسەر فەرمانبەران دابەش دەکەین، لەلایەن بەڕێوەبەرایەتیی نەخشەدانانی ئاوەدانی بەشێوەیەکی ستاندارد نەخشەکان دانراون و تایبەتمەندی گرنگ لەخۆدەگرن."

زانیاریی زیاتر: بە گوتەی وەزیری شارەوانی، 14 هەزار پارچە زەوی ئامادەکراون لەم قۆناغە، بەڵام بەشێکی زۆریان بۆ قەرەبووی جووتیارانە ئەگەر دوای قەرەبووکردنەوەیان زەوی مایەوە بەسەر فەرمانبەران دابەش دەکرێت.