ئەگەری ڕوودانی بوومەلەرزە لە کوردستان هەیە؟

ئاڤا نیوز

لە 12 کاتژمێری ڕابردوودا چەند بوومەلەرزەیەک بە پلەی جیاواز تورکیایان هەژاندووە و ئاڤا میدیا بەدواداچوون بۆ ئەگەری ڕوودانی بوومەلەرزە دەکات لە هەرێمی کوردستان.

چیرۆکی سەرەکی: هەرێمی کوردستان هاوسنوورە لەگەڵ وڵاتی تورکیا، شەوی ڕابردوو بوومەلەرزەیەک بە گوڕی 6.1 پلە بە پێوەری ڕێکختەر لە شارۆچکەی سندرگی لە پارێزگای باڵکئەسیر لە کاتژمێر 10:38 خولەکی شەودا لە قوڵایی 5.9 کیلۆمەتر ڕوویدا، تاوەکو ئێستا هەشت بوومەلەرزەی دیکە وڵاتەکەی هەژاندووە.

لێدوانی فەرمی: سیروان ساڵح، پسپۆڕی جیۆلۆجی بە ئاڤای وت: هەرێمی کوردستان نەکەوتووە سەر هێڵی بوومەلەرزەی پلە بەرز و کاولکار، ئەو بوومەلەرزانەی لە کوردستان ڕوو دەدەن، لە نێوان سێ بۆ پێنج پلەی ڕێکختەرن و هاونیشتمانیان تەنیا هەستیان پێ دەکەن. 

دەشڵێت: ئەگەر هەیە بوومەلەرزە لە ناوچەکانی ڕواندز، گەرمیان و ناوچە سنوورییەکانی نێوان هەرێمی کوردستان و ئێران ڕووبدات، بەڵام تەنیا هەستیان پێ دەکرێت و نابنە هۆی کاولکاری.

زانیاریی زیاتر: بە گوتەی سیروان ساڵح، هەرچەندە ناتوانرێت پێشوەختە پێشبینی بوومەلەرزە بکرێت، بەڵام ئەگەری هەیە لە یەک دوو هەفتەی داهاتوودا لە ناوچەکانی هەمەدان و بەشێکی ڕۆژهەڵاتی کوردستان بوومەلەرزە ڕوو بدەن.