سوودانی: بەشێک لە هێزەکانی ئەمریکا لە عێراق دەمێننەوە

ئاڤا نیوز

محەممەد شیاع سوودانی، سەرۆکوەزیرانی عێراق ئاشكرای دەکات، بەشێک لە ڕاوێژکارە سەربازییەکانی ئەمریکا لەپێناوی چاودێریکردنی سنووری سووریا لە عێراق دەمێننەوە، هاوکات وتیشی، داعش مەترسییەکی گەورە لەسەر عێراق نەماوە.

وێنە گەورەکە: بەغدا و واشنتن لە کۆتایی مانگی ئەیلوولی ڕابردوودا گەیشتنە ڕێککەوتن بۆ دیاریکردنی وادەیەکی فەرمی بەمەبەستی کۆتاییهێنان بە ئەرکی هاوپەیمانیی نێودەوڵەتیی دژی داعش لە وڵاتەکەدا، لە مانگی ڕابردوودا زۆربەی سەربازەکانی ئەمریکا هەردوو بنکەی عەین ئەسەد و ڤیکتۆریایان جێهێشتووە.

لێدوانی فەرمی: محەممەد شیاع سوودانی، سەرۆکوەزیرانی عێراق لە چاوپێکەوتنێکی لەگەڵ ڕۆژنامەی "لۆمۆند"ی فەرەنسی ڕایگەیاند: "پێویستە پەیوەندی نێوان عێراق و ئەمریکا لەسەر بنەمای هاوبەشی نێوان هەردوو وڵات بێت، نەک لەسەر بڕیاری تاک لایەنانە، یەکەیەکی بچووک لە ڕاوێژکارە سەربازییەکانی ئەمریکا لە بنکەی عەین ئەسەد لە ڕۆژئاوای عێراق دەمێننەوە بۆ چاودێریکردنی سنووری سووریا".

سوودانی ئاماژەی بەوە کرد: "ڕێکخراوی تیرۆریستی داعش چیتر مەترسییەکی گەورە لە ناوخۆی عێراق دروست ناکات، بەپێی مەزەندەی وەزارەتی بەرگری لە نێوان 400 بۆ 500 ئەندامی ئەو ڕێکخراوە تیرۆریستییە لە ناوچەیەکی دوورە دەست بەدرێژایی سنووری سووریا و لە باکووری ڕۆژهەڵاتی عێراق بوونیان هەیە".

زانیاریی زیاتر: بەشێکی سەربازانی ئەمریکا کە لە عێراق کشاونەتەوە لە بنکەی هەریر لە هەرێمی کوردستان جێگیرکراون.