ئاڤای خەڵک؛ دانیشتووانی گوندی کەپران داوای قیرتاوکردنی ڕێگای گوندەکەیان دەکەن

ئاڤا نیوز

 

دانیشتووانی گوندی کەپرانی سەر بە ناحیەی بەستۆڕە لە قەزای پیرمام، دوای 19 ساڵ لە چاوەڕوانی، هێشتا چاویان لەسەر ڕێگایەکی قیرتاوکراوە کە گوندەکەیان بە ناوچەکانی دەوروبەرەوە ببەستێتەوە.

 

چیرۆکی سەرەکی؛ دانیشتووانی گوندەکە دەڵێن: "ئەوە 19 ساڵە ئێمە داوای قیرتاوکردنی ڕێگاکەمان دەکەین. تەنیا جارێک چەوڕێژ کراوە و ئەویش ئێستا بە کەڵکی هاتووچۆ نایەت و پڕ بووە لە چاڵ و چۆڵی. ساڵی ڕابردوو تەندەریشی بۆ دەرچوو، بەڵام بەداخەوە پڕۆژەکە جێبەجێ نەکرا."

 

لێدوانی فەرمی؛ لە وەڵامی داواکاری و گلەیی هاووڵاتییاندا، حامد کاکەیی، قایمقامی قەزای پیرمام، دان بەوەدا دەنێت کە پڕۆژەکە دواکەوتووە، بەڵام هۆکارەکەی بۆ نەبوونی بودجەی پێویست دەگەڕێنێتەوە.

 

حامد کاکەیی بە ئاڤای گوت: "ساڵی ڕابردوو ڕێگای گوندەکە ڕاستکرایەوە و بە تەواوی ئامادەکرا بۆ قیرتاوکردن، بەڵام بەهۆی نەبوونی بودجەی پێویستەوە نەمانتوانی قیرتاوەکە تەواو بکەین."

 

ئەوەی پێویستە بیزانیت؛ لەگەڵ ئەوەشدا، قایمقامی پیرمام دڵنیایی دەداتە دانیشتووانی گوندی کەپران و گوندەکانی دیکەی ناوچەکە کە پلان بۆ چارەسەرکردنی ئەم کێشەیە دانراوە. ناوبراو وتی: "ئێستا نەخشەسازی بۆ هەموو ڕێگای گوندەکانی ناوچەکە کراوە و لە نزیکترین کاتدا دەست دەکەین بە قیرتاوکردنی ڕێگای ئەو گوندە و گوندەکانی دیکەی دەوروبەریشی."