وەزارەتی دارایی لیستی مووچەی بڵاوکردەوە: تاوەکو پێش جەژن مووچەی سەرجەم مووچەخۆران دابەش دەکرێت

ئاڤا نیوز

 

وەزارەتی دارایی و ئابووریی هەرێمی کوردستان لیستی مووچەی ئاداری بڵاوکردەوە و سبەی شەممە دەست بە دابەشکردنی دەکرێت، تاوەکو پێش جەژنی ڕەمەزان مووچەی سەرجەم مووچەخۆران دابەش دەکرێت.   

 

ڕاگەیێنراوی فەرمی: وەزارەتی دارایی خشتەی مووچەی بڵاوکردووەتەوە و جەخت دەکاتەوە خشتەکە بەپێی کاتی هاتنی تەمویلی وەزارەتی دارایی عێراق دانراوە، لەکاتی دروستبوونی هەر گۆڕانکارییەک لە هاتنی تەمویلەکە گۆڕانکاری لە خشتەکەشدا دەکرێت.

 

لێدوانی فەرمی: مەولود سابیر، بەرێوەبەری گشتیی بانکی بازرگانیی هەرێمی کوردستان بە ئاڤا نیوزی ڕاگەیاند: کۆی گشتیی پارەی مووچە بۆ مانگی سێ 952 ملیار دینارە، تاوەکو ئێستا 130 ملیار دینار گەیشتوو، بڕیارە تاوەکو ڕۆژی یەکشەممە 822 ملیاری دیکەش لە بەغداوە بگاتە هەرێمی کوردستان، ئێمە لە ماوەی سێ ڕۆژ سەرجەم مووچەکانی مانگی سێ دابەش دەکەین.

 

بۆچی گرنگە: دوای ڕێککەوتنی سەرۆکوەزیران بارزانی و محەممەد شیاع سوودانی، سەرۆکوەزیرانی عێراق، بەغدا بڕیاری ناردنی پارەی بۆ مووچەی مانگی ئاداری مووچەخۆرانی هەرێمی کوردستان دا و بڕیارە لەمەودوا بەیەکجاری کێشەی مووچە چارەسەر بکرێت.