لە بەڕازیل لە پێکدانانی پۆلیس و باندەکانی ماددەی هۆشبەر 64 کەس کوژران

ئاڤا نیوز

دوای ئەوەی پۆلیسی بەڕازیل هەڵیانکوتایە سەر باندێکی بازرگانیکردن بە ماددە هۆشبەرەکان لە شاری ڕیۆ دێ جانێرۆ، بەو هۆیەوە لانیکەم 64 کەس کوژران.

 

چیرۆکی سەرەکی؛ لە ئۆپەراسیۆنێکدا دژی بازرگانانی ماددە هۆشبەرەکان لە شاری ڕیۆ دی جانیرۆی بەڕازیل، شەڕ لە نێوان پۆلیس و دەیان گومانلێکراو دروست بوو.

 

ڕاگەیێنراوی فەرمی: حکومەتی بەڕازیل ڕایگەیاند، لە ئەنجامی ئۆپەراسیۆنەکە زیاتر لە 80 ئەندامی باندەکانی ماددە هۆشبەرەکان دەستگیرکران، هاوکات لایەنیکەم 64 کەس کوژران.

 

زانیاریی بەدەستهاتوو: ئۆپەراسیۆنەکە بە بەشداریی دوو هەزار و 500 پۆلیس دژی یەکێک لە سەرەکیترین باندەکانی بازرگانیکردن بە ماددە هۆشبەرەکانەوە لە دوو گەڕەکی شاری ڕیۆ دی جانیرۆ بەڕێوەچوو.

 

لەلایەکی دیکە؛ ئەم ئۆپەراسیۆنە لە کاتێکدایە، ئیدارەی دۆناڵد ترەمپ، سەرۆکی ئەمریکا ئۆپەراسیۆنی سەربازی لە هەرێمە ئاوییەکانی باشووری وڵاتەکەی لەگەڵ وڵاتانی ئەمریکای لاتین لە دژی قاچاخچییەکانی ماددە هۆشبەرەکان دەستپێکردووە.

 

ڕۆژی سێشەممە وەزیری جەنگی ئەمریکا ڕایگەیاند، "بە فەرمانی ترەمپ هێرشمان کردە سەر چوار بەلەمی قاچاخچییەکانی ماددە هۆشبەرەکان لە ڕۆژهەڵاتی زەریای هێمن، لە ئەنجامی هێرشەکەدا 14 تیرۆرستی ماددە هۆشبەرەکان کە لەسەر بەلەمەکان بوون کوژران".