هەزاران خاوەنپێداویستی تایبەت پشکنینی تەندروستییان بۆ دەکرێت

ئاڤا نیوز

 

وەزارەتی کار و کاروباری کۆمەڵایەتی لە ڕێگەی لیژنەیەک پشکنین بۆ هەزاران خاوەنپێداویستی تایبەت دەکات، پشکنینەکە بۆ ئەو خاوەنپێداویستیە تایبەتنایە کە هیچ مووچە و دەرماڵەیەکیان نییە.

 

وێنە گەورەکە: 70 هەزار خاوەنپێداویستی تایبەت مووچە وەردەگرن، هەشت هەزاری دیکەش کە فەرمانبەرن بووەتە دەرماڵە بۆیان، هاوکات ماوەی 12 ساڵە 13 هەزار و 121 خاوەنپێداویستی دیکە پشکنینیان لە ڕێگەی  لیژنەیەک بۆ کراوە، بەڵام مووچەیان بۆ نەبڕاوەتەوە و چاوەڕوان دەکرێت لەگەڵ پەسەندکردنی بودجەی 2026 تەرخانی داراییان بۆ بکرێت.

 

لێدوانی فەرمی: یوسف چاوشین، بەڕێوەبەرى گشتیی چاودێری و گەشەپێدانی کۆمەڵایەتىی هەولێر بە ئاڤای گوت، "پێش پەسەندکردنی بودجەی ساڵی 2026، لە ڕێگەی لیژنەیەک پشکنین بۆ زیاتر لە 14 هەزار خاوەنپێداویستی دیکە دەکرێت، کە کەمئەندامی جەستەین و شایستەی ئەوەن مووچەیان بۆ ببڕێتەوە."

 

ئەمەش بزانە: مووچەی خاوەن پێداویستی تایبەت ئێستا 100 بۆ 150 هەزار دینارە، وەزارەتی کار لەڕێگەی هەماهەنگی نێوان هەولێر و بەغدا کار لەسەر ئەوە دەکات کە مووچەکانیان زیاد بکرێت، لە بەغدا داوای لیستی جیاوازی بڕەکە کراوە بۆ ئەوەی لە بودجەی ساڵی 2026 تەرخانی داراییان بۆ بکرێت.