وەزیری فەرهەنگ و ئیرشادی ئێران خەڵاتی ڕێزلێنان بە عوسمان هەورامی دەبەخشێت

ئاڤا نیوز

لە شاری سنە، سەید عەباس ساڵحی، وەزیری فەرهەنگ و ئیرشادی ئێران، سەردانی هونەرمەندی گەورەی هەورامان و کوردستان، مامۆستا عوسمان هەورامی، کرد و خەڵاتی ڕێزلێنانی پێبەخشی. ئەم سەردانە نیشانەی ڕێزگرتنە لەم هونەرمەندە گەورەیە کە لەلایەن هونەرمەندە ناسراوەکانی ئێرانەوە، وەک محەممەدڕەزا شەجەریان، بە "خاوەن گەرووی ئاڵتوونی" ناوی دەبرێت. وەزیری ئێرشادی ئێران ستایشی تایبەتمەندیی مۆسیقای هەورامی کرد و بە لووتکەی هونەری ئێران وەسفی کرد.

چیرۆکی سەرەکی: لە ڕێوڕەسمێکدا لە شاری سنە، سەید عەباس ساڵحی، وەزیری فەرهەنگ و ئیرشادی ئێران، بە یاوەریی ئارش لهۆنی، پارێزگاری سنە، سەردانی هونەرمەندی ناوداری سیاچەمانە و سیمبولی هونەری هەورامان، مامۆستا عوسمان هەورامی کرد.

مامۆستا عوسمان هەورامی، کە خاوەنی گەروویەکی پڕ لە هەست و سۆزە و چەندین ساڵە لە بواری هونەری سیاچەمانەدا کار دەکات، بە "خاوەنی گەرووە ئاڵتوونییەکە" ناوی دەبرێت، ئەم نازناوەش لەلایەن هونەرمەندی گەورەی ئێران، محەممەدڕەزا شەجەریانەوە پێی بەخشراوە.

لێدوانی فەرمی: وەزیری ئیرشادی ئێران جەختی لەسەر گرنگیی هونەری هەورامی کردەوە و ڕایگەیاند: "مۆسیقا و گۆرانی هەورامی، هەروەكو سرووشتە جوانەكەی، لە لووتكەی هونەری ئێراندایە و دەبێت ئەم هونەرە بەرزە بپارێزرێت. بەرزی گۆرانیی هەورامیش هەر نەبەستراوە بە جوانی سرووشتی هەورامانەوە، بەڵکو مۆسیقای هەورامی و ئاوازە جوانەكانی تێكەڵ بە سرووشتەكەی بووە."

هەروەها، لە وەسفی تایبەتیی مامۆستا عوسمان هەورامیدا گوتی: "مامۆستا عوسمان سەرەڕای ئەوەی کە زۆر باش گۆرانی دەچڕێت، لە هەورامان زۆر ڕێزیشی لێ دەگیردرێت."

لە کۆتایی سەردانەکەدا، وەزیری فەرهەنگ و ئیرشاد، خەڵاتی ڕێزلێنانی بەخشییە مامۆستا عوسمان هەورامی و لە بەرامبەردا، مامۆستا عوسمانیش وەک دیارییەک و کەمترین دەربڕینی ڕێز، جووتێک کڵاشی دەستکردی هەورامانی بە وەزیری فەرهەنگی ئێران بەخشی.