دوو نووسەری کورد دەبنە براوەی دوو خەڵاتی ئەدەبی لە ئێران

ئاڤا نیوز

 

لە نوێترین خولی خەڵاتی ئەدەبی مێهرەگان لە ئێران، دوو نووسەری خەڵکی ڕۆژهەڵاتی کوردستان و ڕێکخراوێکی ژینگەپارێزیی ناوچەکە، بەهۆی بەرهەم و چالاکییەکانیانەوە خەڵات کران. خەڵاتی مێهرەگان وەک کۆنترین و تاکە خەڵاتی سەربەخۆ و ناحکومیی ئێران لە بواری ئەدەب و ژینگەدا، پێگەیەکی دیار و گرنگی هەیە.

 

چیرۆکی سەرەکی؛ فەوزیە بەشارەت، نووسەری خەڵکی شاری بیجاڕ لە پارێزگای سنە، توانی خەڵاتی بەشی ئەدەبی مێهرەگان لە بواری زمانی دایکدا بەدەست بهێنێت. بەشارەت بەهۆی ڕۆمانی "فرمێسکەکانی ژنێک"ەوە ئەم خەڵاتەی پێ بەخشرا. لە کاتی وەرگرتنی خەڵاتەکەدا، ناوبراو سووربوونی خۆی لەسەر بەکارهێنانی زمانی کوردی دووپات کردەوە و وتارەکەشی هەر بە زمانی دایک پێشکەش کرد، کە ئەم هەڵوێستەی دەنگدانەوەی زۆری هەبوو.

 

لە بەشی کۆمەڵە چیرۆکیشدا، فەرهاد حەیدەری، چیرۆکنووسی خەڵکی کرماشان، وەک براوەی خەڵاتەکە هەڵبژێردرا. حەیدەری بە کۆمەڵە چیرۆکی "هەموومان لە سەردەمی ڕاوکردندا دەژین" بەشداریی لەم کێبڕکێیەدا کردبوو و بەرهەمەکەی لەلایەن لیژنەی داوەرانەوە بە شایستەی خەڵات زانرا.

 

لەلایەکی دیکە؛ لە بەشی ژینگەدا، ئەنجوومەنی ژینگەپارێزیی "ژیوای" پاوە، پلەی دووەمی لەنێوان 112 ئەنجوومەنی ژینگەپارێزی لە سەرتاسەری ئێران و ڕۆژهەڵاتی کوردستاندا بەدەستهێنا. ئەمەش ڕێزلێنانێک بوو لە هەوڵ و چالاکییە بەردەوامەکانی ئەم ڕێکخراوە لەپێناو پاراستنی ژینگەی ناوچەکەدا.

 

ئەمەش بزانە؛ خەڵاتی مێهرەگان لە ساڵی 1999ەوە دەستی بە کارەکانی کردووە و وەک کۆنترین خەڵاتی سەربەخۆی ئەدەبی لە ئێراندا ناسراوە. ئەم خەڵاتە بەهۆی سەربەخۆیی و دوورکەوتنەوەی لە دەستێوەردانی حکومی، توانیویەتی پێگەیەکی تایبەت بۆ خۆی لەنێو نووسەران و ڕۆشنبیراندا دروست بکات. جیاواز لە خەڵاتەکانی تر، مێهرەگان گرنگییەکی تایبەتیش بە بوارەکانی ژینگە و زانست دەدات و ساڵانە لەو بوارانەشدا خەڵات دەبەخشێت.