ژنێکی هیندی دوای ئەشکەنجەدان و دەستدرێژی کردنەسەری لە عێراق بە دزییەوە دەگەڕێتەوە وڵاتەکەی

ئاڤا نیوز

ژنێکی گەنجی هیندی، تەمەن 29 ساڵ، دوای ئەوەی لە عێراق ڕووبەڕووی ئەشکەنجەدان و دەستدرێژی بووەتەوە ڕزگاری بوو و گەڕایەوە وڵاتەکەی، چیرۆکی دڵتەزێنی خۆی و ژمارەیەک ژنی تری هیندی ئاشکرا کرد، کە هێشتا لە هەمان بارودۆخی دژواردا لە عێراق گیریان خواردووە. 

چیرۆکی سەرەکی: ژنێکی خەڵکی شاری مۆگا لە ویلایەتی پەنجابی هیندستان، لە کاتی گەڕانیدا بەدوای کاردا، نووسینگەیەکی گەشتیاری بەڵێنی کارێکی باش و مووچەیەکی زۆری پێداوە لە عێراق، لەگەڵ ڕێگەپێدان بە پەیوەندیکردن بە خێزانەکەیەوە لە هەر کاتێکدا بیەوێت. بەڵام، وەک خۆی دەڵێت، "کاتێک هاتینە عێراق ئەوەی بینیمان بە تەواوەتی جیاواز بوو."

چی ڕوویدا: ئەو ژنە باس لەوە دەکات کە ئەو بە مەبەستی کاری بەرگدروویی سەفەری کردبوو، بەڵام لە عێراق بە زۆر کاری خزمەتکاریی پێ کراوە. دۆخەکە بەرەو خراپتر ڕۆیشتووە کاتێک لەلایەن ئەو کەسەی لەلای کاری کردووە، ڕووبەڕووی دەستدرێژی جەستەیی  بووەتەوە. کاتێکیش هەوڵی بەرەنگاربوونەوەی داوە، ئەو پیاوە ڤیدیۆی تۆمارکردووە و دواتر بە هاوکاری ژنەکەی و خاوەنکارەکەی لێیان داوە. ئەو ژنە چیرۆکی ئەوە دەگێڕێتەوە کە ڕۆژێک بە گۆچان ئەوەندە بە تووندی لێیان داوە تا گۆچانەکە شکاوە.

ئەو ژنە ڕوونیکردووەتەوە کە "بەردەوام ئازاردان و دەستدرێژیکردنە سەری کاریگەری لەسەر دەروونی بەجێهێشتووە و تووشی گوشاری دەروونی کردووە."

زانیاریی زیاتر: دوای هەوڵدانێکی زۆر و بە دزییەوە، توانیویەتی پەیوەندی بە چالاکوانێکی هیندییەوە بکات، کە ئەویش حکومەتی هیندستانی لە دۆخەکە ئاگادارکردووەتەوە. بە هەوڵی چالاکوانەکە و حکومەتی هیندستان، توانراوە ژنەکە بگەڕێندرێتەوە بۆ وڵاتەکەی.

لێدوانی فەرمی: لە لێدوانێکدا بۆ حکومەتی هیندستان، ژنە ڕزگاربووەکە ئاشکرای کردووە کە هاوشێوەی خۆی، هێشتا 20 بۆ 25 ژنی تری هیندی لە عێراق گیریان خواردووە و لە هەمان بارودۆخی خراپدان. ئەمەش نیگەرانییەکی گەورەی دروست کردووە و داوا دەکرێت حکومەتی هیندستان هەوڵەکانی چڕ بکاتەوە بۆ ڕزگارکردنی هاوڵاتیانی تری لەو دۆخەدا.